ने. सं. ११४६ तछलागा षष्ठी -

ब्लु बसयात कयाः सरकारया आलोचना

येँ (नेपालभाषा टाइम्स) – सरकारं साझा यातायातया बसयात वचुगु रंग पानाः ‘ब्लु बस’ दयेकेत्यंगु खँयात कयाः सामाजिक सञ्जालय् विरोध शुरु जूगु दु । सरकारं वइगु साउन १ गते निसें स्वनिगलय् मिस्तय् निंतिं च्यागः ब्लु बस सञ्चालनय् हयेगु तयारी यानाच्वंगु दु । सार्वजनिक यातायातय् मिस्तय्त यौन दुव्र्यवहार जूगु धासें सरकारं मिस्तय्गु निंतिं जक ब्लु बस सञ्चालनय् हयेत्यंगु खः । तर सरकारया थ्व निर्णययात कयाः सामाजिक सञ्जालय् सरकारया समर्थन याइपिं स्वयां विरोध याइपिनिगु ल्याः अप्वःगु दु ।

सामाजिक सञ्जालय् छम्ह मिसां च्वःगु दु, ‘आः गुगुं नं सार्वजनिक यातायातय् मिसा हिंसा जुल धाःसा छाय् ‘ब्लु बस’ मगयागु धकाः धाइगु जुइ मखुला ? मिसापिंत बिस्कं बस मखु सुरक्षित सार्वजनिक यातायात माःगु खः । थ्व सरकारं बांलाःगु ज्या यानाच्वंगु दु व नागरिकया भरोसा नं दु । बांलाःगु ज्याया समर्थन खुले जुयाः यानागु दु, तर सरकार पितृसत्तात्मक सोचं ग्रसित जुइ मजिउ, मिसापिंत निःशुल्क अझ मिसापिंत जक छाय् ? सशक्तिकरण व आर्थिक उन्नतिया मेगु ज्या जुइ फइ मखुला ? मिसापिंत बिस्कं बस मखु, सुरक्षित सार्वजनिक यातायात माःगु खः । मिसातय्त जक छाय् सचेतनामूलक ज्याझ्वः ? दकलय् अप्वः सचेतनामूलक ज्याझ्वः मिजंतय् निंतिं माःगु दु गुपिं पितृसत्तां ग्रसित दु उमित माःगु दु । संसारय् गनं दु ला मिसातय्त फ्रि बस ?’

उकथं हे मेम्हस्यां च्वःगु दु, ‘साझा बस न्हापा १९८० पाखे वचुगु खः लिपा सन् २०१३ य् वाउँगु जुल । हाकनं पुलांगु हे वचुगु रंग यायेगु खँ इतिहास दाहोरो जूगु कि छु ? आः सरकारया नां हे वचुगु सरकार तःसां जिउ ।[

अथे हे उज्यालो नेपाल पार्टीया अध्यक्ष कुलमान घिसिङं च्वयादीगु दु, ‘मिसापिंत सुरक्षित यात्राया निंतिं विशेष व्यवस्था यायेगु सकारात्मक पलाः खः । तर साझा यातायातं विद्युतीय सवारी (इभी) प्रवद्र्धन यासें हरित व दिगो सार्वजनिक यातयातया सन्देश बीत ताः ईनिसें नालाच्वंगु वाउँगु पहिचानयात रङ हिला कमजोर याये मजिउ । वाउँगु रङ केवल रङ जक मखु, वातावरणमैत्री सार्वजनिक यातायातप्रतिया प्रतिबद्धताया प्रतिक नं खः । झीसं हरेक क्षेत्रयात हरित दयेके धइगु राष्ट्रिय संकल्प नं खः । मिसापिंत निःशुल्क विशेष बस सेवा सञ्चालन यायेगु लसकुस यायेबहःजू । तर वास्तविक समाधान धयागु मिसापिसं गुगुं नं सार्वजनिक यातायात छ्यलेबलय् पूर्ण रुपं सुरक्षित महसुस जुइगु वातावरण दयेकेमाः ।’

उकथं हे मेम्ह छम्हेस्यां च्वःगु दु, ‘राज्य कोषं ४ करोड खर्च यानाः थःगु भोट बैंक बचे यायेत मिस्तय्गु निंतिं निःशुल्क बसया व्यवस्था यायेगु धयागु नीतिगत भ्रष्टाचार यायेगु खः, दुनियाय् गनं मदुगु जात्रा हाडी गामय् धायेथें मिसा मोह गुलि घण्टे ग्याङया, बरु, (अपांगता शारीरिक बिकलांग) तय्गु निंतिं निःशुल्क यातायातया व्यवस्था याःगु खःसा बांलाःगु ज्या यात धकाः सरकारया पक्षय् निगू शब्द च्वयेफइगु खः तर भोटया निंतिं सपांग मिसातय्त निःशुल्क बसया व्यवस्था गुगुं नं कथं प्रशंसा यायेत योग्य मजू ।’