गद्दी बैठकय् बेलायती ध्वाँय्या बुट्टा गायब !

येँ -थनया बसन्तपुली च्वंगु गद्दी बैठक पुनर्निर्माण सम्पन्न जुइगु अवस्थाय् थ्यंगु दु । २०७२ सालया तःभुखाचं क्षति जूगु थ्व गद्दी बैठक नेपाःस्थित अमेरिकी राजदूतावासया ग्वाहालिं पुनर्निर्माण याःगु खः । तःभुखाचं क्षति जूगु मरुत्वाःया मेमेगु सांस्कृतिक सम्पदाया पुनर्निर्माण थाति हे लानाच्वंगु दुसां गद्दी बैठकया पुनर्निर्माण धाःसा सिधइगु अवस्थाय् थ्यंगु दु ।

तर पुनर्निर्माण जूगु न्हूगु दरवारय् छता खँ धाःसा पाःगु दु । थ्व दरवारया बरण्डा क्वय् न्हापा बेलायती ध्वाँय्या लसि वःगु बुट्टा तयातःगु खःसा आः उकिया थासय् मेगु हे बुट्टा तःगु दु । पुनर्निर्माण जूगु दरवारया बरण्डाय् बेलायती ध्वाँय् थें च्वंगु बुट्टा लिकयाः मेगु हे बुट्टा तःगु दु । बेलायती शैलीया दरवार जूगुलिं उकी बेलायती ध्वाँय्या बुट्टा तयातःगु खः (घेरा दुने) ।