फिफाया प्रस्ताव विरुद्ध विश्वकप बहिष्कारया ख्याच्वः
जेनेभा – विश्व फुटबलया सर्वोच्च निकाय फिफां विश्वकप लगायत मेमेगु प्रमुख कासाय् निजी इक्विटी लगानी दुत हयेगु धकाः न्ह्यःने हःगु योजनायात थीथी फुटबल महासंघ खुले जुयाः विरोधय् कुहां वःगु दु । विश्वकप लगायत मेमेगु प्रमुख कासाय् निजी इक्विटी दुत हयेगु फिफाया अध्यक्ष जियानी इन्फान्टिनोया प्रस्ताव विरुद्ध युरोपेली फुटबल महासंघ (युइएफए), उत्तर अमेरिका, मध्य अमेरिका व क्यारेबियन फुटबल महासंघ (कन्काफं) खुल्ला रुपं विरोध याःगु खः ।
युइएफएं ला फिफां हःगु प्रस्ताव लित मकाःतले थःपिनि सदस्य राष्ट्र सुयातं नं विश्वकप लगायत फिफाया गुगुं नं कासाय् ब्वति मकायेकेगु ख्याच्वः तकं बिउगु दु । कन्काफंनं प्रस्तावया प्रक्रिया व पारदर्शितायात कयाः गम्भिर आपत्ति प्वंकूगु दु ।
युइएफएं थःपिनि न्यय्न्यागू दुजः देय्या आपतकालीन अनलाइन बैठक तकं च्वनाः जारी याःगु विज्ञप्तीइ विश्वकप फुटबल फिफाया हे सम्पत्ति जूगुलिं थुकी निजी स्वामित्व स्वीकार्य मजुइगु स्पष्ट याःगु दु । लिसें युरोपेली फुटबल महासंघं प्रस्ताव पूर्णरुपं लित मकाःतले थःगु कासा व शासन संरचनाय् निजी स्वामित्व मचायेकेगु बाध्यकारी प्रतिवद्धता मप्वंकूतले फिफां वइगु दिनय् ग्वसाः ग्वइगु छुं नं कासाय् ब्वति मकायेगु नं निर्णय याःगु दु ।
युइएफएं बाह्य लगानीकर्तां विश्वकप थेंज्याःगु प्रतिष्ठित कासाय् स्वामित्वया हिस्सा कायेवं कासा स्वयां नं अप्वः व्यावसायिक लबःयात प्राथमिकताय् लाइगु, लगानीकर्ताया प्रतिफल सुनिश्चित यायेत दबाव लाइगु व विश्व फुटबलया चरित्रय् हे हिउपाः वइगु फिफां ग्वसाः ग्वइगु गुगुं ख्याच्वः नं बिउगु दु । फिफाया थ्व पलाःयात विश्व फुटबलप्रतिया दायित्वपाखें नेतृत्व लिचिउगुया संकेत जूगु नं युइएफएं धाःगु दु ।
थ्व हे झ्वलय् शुक्रवाः छपु विज्ञप्ती पिथँसे फिफां सुनानं फुटबलयात मीत स्वःगु मदगु दावी यासें थः दुजः देय्तलिसे परामर्श जारी हे जुयाच्वनीगु धाःगु दु । दुजः देय्तय् सहमति मदुतले प्रस्तावित फिफा फरवार्ड इन्टरप्राइज (एफएफई) स्थापना मजुइगु व फिफाया वर्तमान व्यावसायिक गतिविधि नं यथावत हे जुइगु विज्ञप्तीपाखें स्पष्ट याःगु दु । फिफां प्रस्ताव बारे खनेदुगु विवादया निंतिं संचारमाध्यमय् वःगु गलत विवरणयात जिम्मेवार जूगु ठहर नं याःगु दु ।
फिफा अध्यक्ष इन्फान्टिनों फिफाया व्यावसायिक सम्पत्तिया २० प्रतिशत हिस्सा निजी लगानीकर्तायात मियाः न्हूगु सहायक कम्पनी एफएफई स्थापना यायेगु प्रस्ताव न्ह्यःने हःगु खः । सार्वजनिक विवरणकथं प्रमुख लगानीकर्ता अमेरिकी लगानी कम्पनी जुइ । थ्व कम्पनी अमेरिकी राष्ट्रपति डोनाल्ड ट्रम्पया जिलाजं जारेड कुश्नरया किजा जोशुआ कुश्नरं नीस्वंगु खः ।
प्रस्तावकथं फिफाया २११ दुजः देय्या फुटबल संघयात सन् २०३८ तकया दुने प्रत्येक करिब ८ गू करोड ६० गू लख डलर तक ग्वाहालि दइगु दावी यानातःगु खः ।
LEAVE YOUR COMMENTS