ने. सं. ११४६ चाैलागा चर्हे - मातातीर्थ चःह्रे

धरहराया पसः थुना छ्वत

येँ – धरहरा लागाय् पसः तयेत दयेकातःगु टहरा फुक्कं येँ महानगरपालिकां थुना बिउगु दु । २२ वडाया वडाध्यक्ष चिनिकाजी महर्जनया नेतृत्वय् अन दुगु पसः थुना बिउगु खः । वंगु झिंन्यादँ न्ह्यवंनिसें अन साइड वाकर्सं मनपालिसे सम्झौता यानाः पसः तयेगु ज्या याःगु खःसा स्थानीय वासिन्दां उगु इलंनिसें ऐतिहासिक व सांस्कृतिक मूल्य मान्यता दुगु थाय्यात व्यापारीकरण याये मजिउ धकाः विरोध याना वयाच्वंगु खः ।

धरहरा लागाय् मुक्कं १५ गू पसः दुगु खःसा म्हिगः मनपां डोजर हयाः उगु पसः फुक्कं थुनाबिउगु खः । पसः थुनेगु ज्यायात कयाः ‘नेपालभाषा टाइम्स’ खँ ल्हासें वडाध्यक्ष महर्जनं देशया कार्यकारी प्रमुखं घोषणा याःगु योजनायात थःपिंसं सहजीकरण जक यानागु खँ कनादीगु दु ।

प्रधानमन्त्री केपी ओलीं तःभुखाचं धरहरा दुना वनेधुंकाः अन मेगा प्रोजेक्ट कथं २२ तँ दुगु धरहरा दयेकेगु योजना सार्वजनिक यानादीगु खः ।
अन बाः वयाच्वंगु दयेक दयेकं पसः थुनेगु उचित जुइ ला धइगु नेपालभाषा टाइम्सया न्ह्यसःया लिसः बिसें वडाध्यक्ष महर्जनं सांस्कृतिक मूल्य मान्यताया ह्यःने ध्यबा गौण जूगु खँ कनादिसें धयादी, ‘छुं नं ऐतिहासिक सांस्कृतिक मूल्य मान्यता दुगु थाय्यात व्यापारीकरण यायेगु ज्या याये मजिउ ।’

लिसें वय्कलं स्थानीय जनतां झिंन्यादँ न्ह्यवंनिसें याना वयाच्वंगु आन्दोलनया विजय दुगु धासें मेमेगु थासय् नं आः थज्याःगु नजिर बने जुइगु खँ नं कनादिल ।

पसः थुने मते धकाः गुलि तक दबाब वल धइगु न्ह्यसःया लिसः बिसें वय्कलं धयादिल, ‘दबाब ला यक्वं वःगु खः । आः थज्याःगु दबाब वइ धकाः जिगु मोबाइलया स्वीच हे अफ याना तयागु दु ।’

गनं सुनां दबाब बिल धइगु खँय् धाःसा वय्कलं धयादिल, ‘सुयागुं नां कायेगु उचित जुइमखु । तर जिमित दबाब वःगु खः । अथे जुयाः मोबाइल अफ जक मखु सिम कार्ड हे मेगु तयातयागु दु ।’ अन दुगु पसः थुनेगु निंतिं मनपाया नगर प्रहरी, येँ महानगरीय प्रहरी प्रभाव जनसेवाया प्रहरीतय्सं नं ग्वाहालि याःगु खः । अन पसः थुनाः उगु लागायात खुल्ला हे याना तयेगु ग्वसाः दु ।