मिं नइगु घटनाया नियन्त्रणया निंतिं योजना

येँ – येँ महानगरपालिकां मिं नइगु घटनाया नियन्त्रणया निंतिं योजना दयेकूगु दु । महानगरपालिकां मिं नयाः जुइ फुगु सम्भावित घटना नियन्त्रण व छुं जुयाः अज्याःगु घटना जू हे जुल धाःसा उकिं जुइगु क्षति म्हो यायेत योजना दयेकूगु खः । येँ महानगरपालिकां दयेकूगु योजनाकथं दमकलयात अझ अप्वः प्रभावकारी याइगु जूगु दु ।

दमकलयात गप प्रभावकारी यायेत आवश्यक उपकरणया न्यायेगु नापं दमकल दुहां वने मफइगु थासय् पाइपया व्यवस्था यायेगु योजना मनपां दयेकूगु दु । येँ महानगरपालिकाया प्रमुख विद्यासुन्दर शाक्यं महानगरया दुनेया लागाय् आपालं थाय् चिचिब्याःगु गल्लि दुगु व अज्याःगु थासय् दमकल दुहां वने मफइगु जूगुलिं लः यंकेत पाइपया व्यवस्था यायेत्यनागु धयादिल ।

वय्कलं धयादिल, ‘मिं नइगु घटना लगायतया विपद् व्यवस्थापनया निंतिं सामुदायिकस्तरय् वाति लः मुंकेगु व उकिया निंतिं ट्यांकीया निर्माण यायेगु जुइ ।’लिसें वय्कलं येँ मनपाया विपद् व्यवस्थापन यायेगु नीतिकथं महानगर दुनेया थीथी थासय् दमकल लगायत विपद् व्यवस्थापनया निंतिं माःगु उपकरणया नं व्यवस्था यायेगु जुइ धयादिल ।

विपद्या घटना जुइबलय् तत्काल हे लःया व्यवस्था याये मफइगु जूगुलिं उकिया निंतिं आवश्यक पूर्व तयारी यायेगु प्रमुख शाक्यं धयादिल ।
महानगरपालिकां मिं नइगु घटना लगायत मेमेगु विपद् व्यवस्थापनया निंतिं उकथंया योजना दयेकागु जानकारी बिउगु दु ।

महानगरवासीयात जुइ फुगु सम्भावित खतरा व जोखिम न्यूनीकरणया निंतिं जोखिमया अवस्थाय् दुगु पेट्राल पम्प व ग्यास स्टेशनत नं चिइकेगु महानगरपालिकां योजना दयेकूगु येँ मनपा प्रमुख शाक्यं कनादिल ।