मरुसतः जगंनिसें दयेकेगु कि द्यःनें जक दयेकेगु ?

येँ – मरुसतः पुनर्निर्माणया ज्या थ्वहे वइगु वैशाख १७÷१८ गते निसें न्ह्याकेगु तयारी जुयाच्वंगु खँ सीदुगु दु । मरुसतः पुनर्निर्माणया ज्या न्ह्याइन धकाः चर्चा जूसां येँ महानगरपालिकाय् धाःसा थुकिया बारे अझ नं ठोस खँ मजूनिगु खँ सीदुगु दु ।
पुनर्निर्माण यायेगु धकाः धाःसां नं मरुसतः गुकथं दयेकेगु धइगु बारे धाःसा पूवंक डिजाइन मवःनिगु खँ येँ महानगरपालिकाया मेयर विद्यासुन्दर शाक्यं ‘नेपालभाषा टाइम्स’ यात कनादिल ।

मेखे पुरातत्व विभागया सचिव लिसें प्रवक्ता रामबहादुर कुँवरं विभागं मरुसतःया डिजाइन दयेकाः बीधुनागु खँ कनादिसें उकियात हाकनं छकः रिफाइन यायेमाःगु खँ धयादीगु दु । मेयर शाक्यं मरुसतः दयेकेगु निंतिं उपभोक्ताया मोडेल कथं स्थानीय व्यक्तियात नं दुथ्याकाः पुनर्निर्माण यायेगु कथं तयारी जुयाच्वंगु जानकारी बियादीगु दु । वय्कःया कथं मरुसतःया जग पूवंक हे स्यंगु खः कि मखु धइगु रिपोर्ट मवःगुलिं यानाः नं डिजायनय् समस्या समस्या जुयाच्वंगु दु ।

जगया बारे अध्ययन जुयाच्वंगुलिं आः विद्यमान जगया द्यःने हे पुनर्निर्माण यायेगु खः कि जगंनिसें हे म्हुयाः पुनर्निर्माण यायेगु खः धइगु बारे नं अन्यौल जुयाच्वंगु खँ वय्कलं कनादिल । मेयर शाक्यं धयादी, ‘जगंनिसें थुनाः दयेकेमाःगु खः कि मखु वा जगया द्यःने जक दयेकूसां गाः धइगु खँय् अनुसन्धान जुयाच्वंगु दु । उकिया रिपोर्ट वयेधुंकाः जक मरुसतः दयेकेगु ज्या न्ह्याः वनी ।’

वय्कलं नं मरुसतः याकनं हे दयेकेगु ज्या न्ह्याइगु खँ कनादिसें उपभोक्तायात गुकथं दुथ्याकेगु धइगु बारे अध्ययन जुयाच्वंगु खँ नं कनादिल । ‘मरुसतः पुनर्निर्माणया निंतिं स्थानीययात गुकथं दुथ्याकेगु धइगु बारे सहलह जुयाच्वंगु दु’ मेयर शाक्यं कनादिल ।

दिलीप शाही

च्वमिया मेमेगु

• सहकारीं त्यासा काःपिं त्यासा पुलेत अनिइच्छुक
• निकास पने मजिल
• राष्ट्रपतिया विवादित पलाः !
• अलमलय् राजनीतिक दलत
• अनिश्चितताय् लानाच्वंगु राजनीति