थौं सुरक्षित इन्टरनेट दिवस
यल(नेपालभाषा टाइम्स)- थौं विश्वन्यंकं सुरक्षित इन्टरनेट दिवस थीथी ज्याझ्वः यासें हनाच्वंगु दु । नेपालय् नं चाइल्ड सेफनेट नांया संस्थापाखें थ्व दिवसया लसताय् थीथी ज्याझ्वः यासें हनाच्वंगु दु ।
‘बांलाःगु व सुरक्षित इन्टरनेटया निंतिं नापनापं’ धइगु नारा बियाः नेपाःलिसें विश्वव्यापी रुपय् सुरक्षित इन्टरनेट दिवस हना वयाच्वंगु दु । थुगु दिवसं मस्त, ल्याय्म्ह, अभिभावक, शिक्षक, सामाजिक कार्यकर्ता, व्यापारिक कम्पनी, सरकार व नीति निर्मातातय्त बांलाःगु इन्टरनेट सिर्जनाया निंतिं ग्वाहालिया ल्याखं छप्पँ जुइत आह्वान याइगु विश्वास याःगु दु ।
छगू तथ्यांककथं विश्वव्यापी रुपय् कोभिडया महामारी लिपा अनलाइन बाल यौन दुव्र्यवहार व यौन शोषणया घटना उल्लेख्य मात्राय् वृद्धि जूग्ु दु । संयुक्त राज्य अमेरिकाया नेशनल सेन्टर फर एक्सप्ल्वाइटेड एण्ड मिसिङ्ग चिल्ड्रेन सेन्टरं सन् २०१९य् ६३,२६६ गू नेपाःमि मस्त व मिसातय् यौन दुव्र्यवहारया किपात साइबर टिप्लाइन रिपोर्ट प्राप्त याःगु खः । अथे हे सन् २०२१ य् ४१५ प्रतिशतं वृद्धि जुयाः नेपाःमि मिसा व मस्तय्त कयाः जूगु उकथंया यौन दुव्यर्वहारया किपा साइबर टिप्लाइन रिपोर्टय् २,६३,१३० थ्यंगु दु ।
थ्व बाहेकं नेपाल सरकारं पोर्नोग्राफिक साइटय् प्रतिबन्ध तयेधुंकाः नेपालय् निम्हय् छम्ह ल्याय्म्ह व नच्चापिं ल्याय्म्ह ल्यासे व स्वम्हय् छम्ह ल्याय्यम्ह ल्यासें अनलाइनय् यौनजन्य सामग्री स्वयेगु यानाच्वंगु चाइल्ड सेफनेट व युनिसेफया अध्ययनं क्यंगु दु ।
चाइल्ड सेफनेटया संस्थापक नापं अध्यक्ष अनिल रघुवंशीं थुकथंया दिवसं प्रविधियिा सकारात्मक प्रयोगयात अप्वयेकेत व मस्तलिसें ल्याय्म्हल्यासेया निंतिं बांलाःगु व सुरक्षित अनलाइन वातावरण दयेकेत ग्वाहालि याइगु विश्वास प्वंकादीगु दु । मस्त व ल्याय्म्हतय्त वास्तविक जीवनय् थें अनलाइनय् नं सुरक्षित अधिकार दगुुलिं अनलाइन बाल सुरक्षा सरकार, नीति निर्माता, प्रहरी, अभिभावक, ब्वनेकुथि, व्यापारिक कम्पनी व सामाजिक संघसंस्थालिसें सरोकारवाला व जिम्मेवार निकायतय् प्राथमिकताय् लायेमाःगु वय्कःया धापू दु ।
मस्त व ल्याय्म्हतय्सं प्रविधिया अप्वः प्रयोग याइगुलिं इन्टरनेटया असुरक्षित प्रयोगं इमित अनलाइन यौन दुव्र्यवहार व शोषण, साइबरबुलिङ, साइबु ग्रुमिङ, फिसिङ व सेक्सटोर्सन थेज्याःगु गम्भिर जोखिमय् लायेफगु संस्थां न्ह्यथंगु दु ।
मस्त व ल्याय्म्ह पुस्ताया निंतिं सुरक्षित इन्टरनेटया निंतिं ज्या याना वयाच्वंगु चाइल्ड सेफनेटं सन् २०१९ निसें नेपालय् सुरक्षित इन्टरनेट दिवसया समन्वय व प्रवद्र्धनया निंतिं ज्या याना वयाच्वंगु दुसा थ्व झ्वलय् थुगुसी थौं माघ २४ गते थ्व दिवस हनाच्वंगु इलय् अनलाइन सुरक्षा व सचेतनाया ज्याझ्वः धाःसा दछियंकं हे याना वनेगु संस्थां जानकारी बिउगु दु ।
LEAVE YOUR COMMENTS