मंसिर ४ गते चुनाव जुइफु
येँ (नेपालभाषा टाइम्स)÷निर्वाचन आयोगया प्रमुख निर्वाचन आयुक्त दिनेश थपलियां सरकारं वइगु मंसिर ४ गतेया नितिं आम चुनावया तिथि क्वःछीगु दावी यानादीगु दु । म्हिगः आयोगं याःगु पत्रकार सम्मेलनय् न्ववासें वयक्लं आः च्वनीगु मन्त्रिपरिषद बैठकं निर्वाचनया मिति घोषणा याःसा अजू चायेम्वाःगु खँ धयादिल ।
आयोगं मंसिर २ गते चुनाव यायेत इनाप याःगु खःसां वकुन्हु शुक्रवाः लाःगुलिं मंसिर ४ गते आइतवाः कुन्हु चुनाव यायेगु कथं तिथि क्वःछीफुगु खँ धाःगु दु ।
निर्वाचन आयोगं प्रतिनिधिसभा व प्रदेशसभा चुनावया नितिं फुक्कं तयारी लिसें तिथि घोषणा यायेत सिफारिस याःगु खः । आयोगया परामर्शय् सरकारं तिथि क्वःछीगु कानुनी व्यवस्था दु ।
प्रमुख आयुक्त थपलियां आः वइगु निर्वाचनय् खर्च अप्वः जुइगु खँ कनादीगु दु । वंगु चुनावय् आयोगं २ करोड मतपत्र छापे याःगु खःसां थ्व चुनावय् ८ करोड मतपत्र छापे यायेमाःगु जूगुलिं खर्च अप्वइगु खँ वय्कलं कनादिल । स्थानीय निर्वाचनय् छगू मतदान केन्द्रय् छगः जक मतपेटिका तःगु खःसा थ्व निर्वाचनय् प्यंगः मतपेटिका तयेत्यंगु दु । अथे हे वइगु थुगुसी मतदाता नं अप्वइगु जुयाः कर्मचारी नं अप्वयेकेमाःगु अवस्था जुयाच्वंगु दु ।
सर्वोच्च अदालतं कैदी बन्दी, वृद्धाश्रमय् दुपिं नागरिकयात नं मतदान याकि धकाः उजं बियातःगु जूगुलिं अस्थायी मतदाता परिचय पत्र दयेकेमाःगु, कर्मचारीयात तलब १५ प्रतिशतं अप्वइगु जुयाः थुगुसी चुनाव खर्च अप्वइगु अनुमान जुयाच्वंगु दु ।
थुगुसी प्रतिनिधिसभा, प्रदेशसभा जक मखु राष्ट्रपति व उपराष्ट्रपति तकया नं निर्वाचन यायेमाःगु जुयाच्वंगु दु ।
अथे खःसां संघ व प्रदेशया निर्वाचन धाःसा स्थानीय निर्वाचन सिबें दनीगु खँ प्रमुख आयुक्त थपलियां दावी यानादीगु दु । वय्कलं धयादिल, ‘पुलांगु हे मतपेटिकात छ्यलेगु जुइ, निर्वाचनय् छ्यलेगु सामग्रीया फेहरिस्त तयार यायेगु ज्या जुयाच्वंगु दु, झीसं छगू हे चरणय् निर्वाचन क्वचायेकेबलय् खर्च कटौती जुइ ।’
स्थानीय चुनावय् सरकारं छुटे याःगु बजेट सिबें म्हो जक ध्यबा खर्च जूगु खः । निर्वाचनया लागिं सरकारं सरकारं ८ अर्ब ११ करोड तका निकासा याःगु खःसां चुनाव जूबलय् ५ अर्ब ४ करोड ३ लाख ९२ हजार तका जक खर्च जूगु खः ।
LEAVE YOUR COMMENTS