अफगानिस्तान युद्धं मस्त खतराय्, स्वन्हुया दुने २७ म्ह सित

एजेन्सी- अफगानिस्तानय् सरकारी सेना व तालिबान दथुइ जुयाच्वंगु युद्धय् लानाः स्वन्हुया दुने २७ म्ह मस्त सीगु दु । राष्ट्रसंघया बालबालिका सम्बन्धी नियोग युनिसेफं थुकिया जानकारी बिउगु खः । युनिसेफं अफगानिस्तानया युद्धय् मस्तय्त जुइगु हिंसा अप्वयावंगु, स्वन्हुया दुने २७ म्ह मस्त सीगु व युद्धय् लानाः १३६ म्ह मस्त घाःपाः जूगु धाःगु दु । युनिसेफं ताःईनिसें मस्तय्गु निंतिं अफगानिस्तान विश्वया दकलय् बामंलाःगु थाय् जुयाच्वंगु व वंगु ७२ घौ दुने स्थिति झन् बांमलानावंगु नं धाःगु दु । युनिसेफया कथं कान्दाहार,खोस्त व पाक्तिया प्रान्तय् २७ म्ह मस्त सीगु खः । लँय् लानाच्वंगु बम व निगू पक्ष दथुइ जुयाच्वंगु युद्धय् लानाः मस्त सीगु खः । युनिसेफं मस्तय्गु संरक्षणया निंतिं निगुलिं पक्षयात इनाप याःगु दु । लछिया दुने द्वःछिसिबें अप्वः सर्वसाधारण मनूत अफगानिस्तानय् सीधुंकूगु दु । तालिबानतय्त अन्तर्राष्ट्रिय स्तरं युद्धविराम यायेत अपील याःगु खःसां तालिबानतय्स अपीलयात अस्वीकार याःगु दु ।
तालिबानतय्सं अफगानिस्तानया दक्षिण पश्चिमय् लाःगु निम्रोज प्रान्तया जारन्ज, उत्तरी क्षेत्रय् च्वंगु जोजन राज्यय् च्वंगु सेबर्घान सहर, उत्तरी क्षेत्रय् च्वंगु कुन्दुज, सार ए पुल व तालोकान सहरयात थःपिनिगु कब्जाय् कायेधुंकूगु दु । तालिबानतय्सं कब्जाय् काःगु सहर मध्ये कुन्दुज दकलय् महत्वपूर्ण सहर खः । कुन्दुज अफगानिस्तानया राजधानी काबुललिसे स्वानाच्वंगु दु । तालिबानतय्सं आतकं खुगू प्रान्तीय राजधानी कब्जा यायेधुंकूगु दु ।
अफगानिस्तानया थीथी सहरय् युद्ध जुयाच्वंगु मदिउनि । अमेरिकी सेना व अफगानी सेनां तालिबानतय्त हवाइ हमला नं यानाच्वंगु दुसा अफगानी अधिकारीतय्सं यक्व हे तालिबानत सीधुंकूगु धाःगु दु । थुखे तालिबानतय्सं अमेरिकायात कारवाही मयायेत ख्याच्वः नं बिइधुंकूगु दु ।
अफगानिस्तानं अमेरिकाया सेना लिहां वनेगु शुरु जुसांनिसें तालिबानतय्सं शहरी लागाय् नं आक्रमण तच्वयेका हःगु खः । थ्व हे झ्वलय् पाकिस्तानया विदेशमन्त्री साह मोहम्मद कुरेसीं अफगानिस्तानं अमेरिकां गैरजिम्मेवाररुपं सेनां लित यंकूगु धाःगु दु । अफगानिस्तानया शान्ति प्रक्रियाया निंतिं पाकिस्तानं नं ज्या यानाच्वंगु व आः शान्ति प्रक्रिया धराप लाःगु नं विदेशमन्त्री साहं धाःगु दु ।

सम्बन्धित बुखँ

LEAVE YOUR COMMENTS