प्रधानमन्त्री भारत वनी कि वनीमखु ?

येँ (नेपालभाषा टाइम्स) – प्रधानमन्त्री बालेन शाहयात भारत भ्रमणया निंतिं ब्वनापौ छ्वयाहःसां नं प्रधानमन्त्री शाह भारत भ्रमणय् वनीगु खः कि मखु धइगु खँय् अन्यौल हे दनिगु खँ धाःगु दु । भारतपाखें ब्वनापौ वयेधुंकाः नं सरकारं आधिकारीक रुपं वनेगु मवनेगु छुं धाःगु मदुनि ।

थ्वहे दथुइ वइगु सेप्टेम्बर ८ निसें २२ ताखिर तक संयुक्त राष्ट्र संघया ८१ क्वःगु महासभा जुइत्यंगु दु । उगु सभाय् नं प्रधानमन्त्री शाह वनीगु खः कि मखु धइगु खँय् परराष्ट्र मन्त्रालयं हे अन्यौलय् लानाच्वंगु खँ धाःगु दु । संयुक्त राष्ट्र संघया ज्याझ्वलय् नं अप्वः यानाः सरकार प्रमुख वा राष्ट्र प्रमुख वनेगु यानाच्वंगु खःसा प्रधानमन्त्री शाहं भ्रमणयात कयाः खास हे चिउताः क्यनाच्वंंगु मदुगु खँ सूत्रं धाःगु दु । उदि उगु महासभाय् प्रधानमन्त्री शाहं ब्वति मकाइगु जुल धाःसा परराष्ट्र मन्त्री शिशिर खनालं हे ब्वति काइगु जुइ ।

अन्तर्राष्ट्रिय स्तरय् जुइगु ज्याझ्वलं सम्बन्ध विस्तार यायेगु व क्वातुकेगु ज्या याइ । तर राष्ट्र प्रमुख उपस्थिति मजुल धाःसा थज्याःगु ह्वःताः मदयेफु । थ्व खँय् प्रधानमन्त्रीं बिचाः यायेमाःगु खँ परराष्ट्रविद्तय्सं धाःगु दु ।