माःबतिइ न्ह्यःने महाबू ध्वाखाया उलेज्या
येँँ (नेपालभाषा टाइम्स) – येँ महानगरपालिका २७ वडां वीर अस्पतालं महाबू दुहां वयेगु थासय् दयेकूगु महाबू ध्वाखा (प्रवेश द्वार)या उलेज्या याःगु दु ।
बागमति प्रदेशया पुलांम्ह मन्त्रीलिसें प्रदेशसभा सदस्य हरिप्रभा खड्गी श्रेष्ठ व येँ महानगरपालिकाया कार्यवाहक प्रमुख सुनिता डंगोलं मंकाःकथं उगु ध्वाखाया उलेज्या यानादीगु खः ।
ध्वाखा उलेज्या लिपा कार्यवाहक प्रमुख डंगोलं ध्वाखाया निर्माणं आः महाबू लागाया धार्मिक व पर्यटकीय महत्व अप्वया वंगु दु धासें थुकथंया संरचना निर्माणं स्थानीय पर्यटन प्रवद्र्धन यायेत तिबः जुइगु विश्वास प्वंकादिल ।
२७ वडाअध्यक्ष योगेश खड्गीं येँ देय्या सांस्कृतिक व ऐतिहासिक धरोहरकथं मयातःगु महाबू लागाया म्हसीका व सौन्दर्य अप्वयेकेगु उद्देश्यं वडापाखें ‘महाबू ध्वाखा’ निर्माण याागु खँ कनादिल । वडाअध्यक्ष खड्गीं थुकथंया कलात्मक ध्वाखाया निर्माणं उगु लागाया ऐतिहासिक गरिमायात अझ च्वन्ह्याकीगु विश्वास नं प्वंकादिल ।
छगू करोड न्हय्गू लख ग्वीप्यद्वः लागतय् परम्परागत नेवाः शैलीं दयेकूगु ध्वाखां महाबू व मुक्कं वडाया हे म्हसीकाया स्मारकया रुपय् दयेकागु वडा अध्यक्ष खड्गीं कनादिल ।
ध्वाखाया जवंखवं शान्तिया प्रतीककथं ली पाताय् कियातःगु बुद्धया मिखा तयातःगु दुसा महाबू विहारया प्रतीककथं गजू थापना यानातःगु दु ।
आर्किटेक्ट इन्जिनियर गौरव श्रेष्ठ डिजाइन यानादीगु ध्वाखाया शोभा अप्वयेकेगु ल्याखं पंचबुद्धया मूर्ति झ्वःलिक्क तयातःगु दु । धातुया ट्रस्ट व कंक्रिटया बिमय् आधारित प्यागोडा शैलीइ दयेकातःगु ध्वाखाय् ली व सिजः ल्वाकछ्यानाः पौ दयेकातःगु दु ।
इन्जिनियर श्रेष्ठं कनादीकथं भुखाय्या सुरक्षाया दृष्टिकोणं सुरक्षित व जमनि क्वय् ६ मिटर जाःया ‘पाइल फाउण्डेसन’ तयातःगु दु । ध्वाखा निर्माणय् तःगु थुकथंया फाउण्डेसन नेपालय् न्हापांखुसी जूगु वय्कः धापू दु ।
LEAVE YOUR COMMENTS