ज्यापु संस्कृति विकास कोषया मंकाः गुरु हनेज्या
येँँ (नेपालभाषा टाइम्स) – ज्यापु संस्कृति विकास कोषपाखें ज्यापु समुदायया येँ महानगर दुनेया परम्परागत ६३ गू त्वाः, गुथि, खलःया मू गुरुपिंत मंकाःकथं गुरु पुजा व हनेज्या याःगु दु । कोषं गुरुपुन्हिया लसताय् लाकाः याःगु थ्व २३ क्वःगु मंकाः गुरुपुजा खः ।
येँ महानगरपालिकाया कार्यवाहक प्रमुख सुनिता डंगोलया प्रमुख आतिथ्यताय् जूगु ज्याझ्वलय् ज्यापु समुदायया परम्परागत बाजं, संस्कृति, संस्कार, मौलिक म्हसीका संरक्षणय् महत्वपूर्ण योगदान बिया वयाच्वनादीपिं मू गुरुपिंत हनेज्या याःगु खः ।
ज्याझ्वलय् नवासें कार्यवाहक प्रमुख डंगोलं संस्कार, संस्कृति, कलायात न्हू पुस्तायात लःल्हायेगुलिइ गुरुपिनिगु भूमिका तसकं महत्वपूर्ण जू धयादिसें न्हू पुस्तायात संस्कार, संस्कृति स्यनीपिं गुरुपिंत हनेज्या याये खंगुलिं लसता प्वंकादिल ।
संस्कार व संस्कृति गुलि पुस्तान्तरण जुया वनी उलि हे उकिया प्रभाव नं सकारात्मक जुइ व बांलाःगु समाजया नं विकास जुइ धासें कार्यवाहक प्रमुख डंगोलं धयादिल, ‘गुरुपिंसं थम्ह सः, सिउगु ज्ञान, सिप व परम्परायात पुस्तान्तरण याना यंकाः सामाजिक संस्कृति व सांस्कृतिक निरन्तरता कायम यायेत महत्वपूर्ण योगदान बिया वयाच्वंगु दु ।’
‘संस्कृति संरक्षणया निंतिं आर्थिक पक्ष अतिकं महत्वपूर्ण जुइ, आर्थिक अवस्था कमजोर जुइगु अवस्थाय् मौलिक कला, संस्कृति ल्यंकेत थाकुइ व हाथ्या वइ ’, वय्कलं धयादिल, ‘थ्व हे कारणं येँ महानगरपालिकां बिया वयाच्वंगु गुरु भत्ता न्यय्द्वः थ्यंकागु जानकारी बियादिल ।
कोषया नायः मंगलकृष्ण सिंहं कोषं स्थापनाकालनिसें हे गुरुपिंत हनेज्या याना वयाच्वनागु जानकारी बियादिसें संस्कृतियात जीवन्त याना तयेया निंतिं योगदान बिया वयाच्वनादीपिं गुरुपिंत हनेज्या याये खंगुलिं गर्व महसुस जू धयादिल ।
ज्यापु समुदायया संस्कृति, परम्परा, मौलिक म्हसीका ल्यंका तयेत गुरुपिंसं बिया वयाच्वनादीगु योगदानया सम्मान यायेगु हे कोषया महत्वपूर्ण उद्देश्य जूगु वय्कःया धापू खः । वय्कलं धयादिल, ‘परम्परागत बाजं, सांस्कृतिक ज्ञान, संस्कृति, सामाजिक परम्परा जीवन्त याना तयेत गुरुपिनिगु ज्वःमदुगु योगदान दु, थज्याःगु ज्याझ्वलं न्हू पुस्तायात नं थुखेपाखे आकर्षित याइ ।’
कोषं वंगु २३ दँ न्ह्यःनिसें मदिक्क दँय्दसं गुरुपुजाया दिंकुन्हु ज्यापु समुदायया सांस्कृतिक, धार्मिक व परम्परागत महत्व कुबिया वयाच्वंगु संस्कृति, परम्परा संरक्षण यानाः गुरुपिंत हनेज्या याना वयाच्वंगु दु ।
कोषया नायः सिंहया सभापतित्वय् जूगु ज्याझ्वलय् न्वकु सन्तकुमार महर्जनं लसकुस यानादीगु खः । उगु हे ज्याझ्वलय् आः वइगु यःमरि पुन्हिकुन्हु हनीगु राष्ट्रिय ज्यापु दिवसया संयोजन यायेगु भालाया पाःब्व नं लःल्हाःगु खः । ज्याझ्वलय् थुगुसीया ज्यापु दिवसया पाःब्वः ग्वल त्वाःया नायः आशामान संगतयात लःल्हाःगु खः । पाःब्वलिसें खलःयात कोषपाखें निगू लख तका दां नं लःल्हाःगु खः ।
LEAVE YOUR COMMENTS