ने. सं. ११४४ कौलाथ्व एकादशी - चालं

एटीएमया ध्यबा खुइत क्रेन

थम्हं मेहनत यानाः कमे यानातःगु ध्यबा सुरक्षित रुपं संचय याना तयेत मनूतय्सं बैकय् यंकाः ध्यबा तयेगु याइ । अले व ध्यबा लिकायेत न्हापा न्हापा जूसा चेक च्वया लिकाइगु खः । तर गबलें गबलें चेकय् खातावालया ल्हाःचिं (साइन) मिले मुइगु, गबलें आखः केरमेट जूगु, गबले तिथिमिति द्वनाच्वनीगु व गबलें खाताय् गाक्क ध्यबा मदयाच्वंगु अनेक समस्यात वयाच्वनीगु खः ।

वयां लिपा गाहाकि (खातावाल)यात ध्यबा लिकाये अःपुकेया निंतिं न्हूगु प्रविधिया विकास जुल एटीएम । थ्व एटीमं ध्यबा लिकायेत उलि थाकू मजू । उकिं थुकिया प्रयोग अप्वया वनाच्वंगु दु । तर चेकं ध्यबा लिकायेबलय् गुलि सुरक्षित जुइगु खनेदु, एटीएमया प्रयोग धाःसा उलि सुरक्षित मजू ।

गबलें गबलें एटीएमय् गलत पासवर्ड तयाः व थःगु पासवर्ड पत्ता लगे यानाः थःगु खाताया ध्यबा अनाधिकृत रुपं लिकया यंकूगु समाचार झीसं ब्वना वयाच्वनागु हे खः । एटीएम मेशीनं ध्यबा खुया यंकूगु समाचार बरोबर धइथें वयाच्वं । थ्व छगू कथं सामान्य घटना हे धायेमाली । तर एटीएम मेशीन हे खुया यंकूगु घटना धाःसा धाथें छगू न्हूगु व अजू चायापुगु घटना खः ।

थ्व घटना उत्तरी आयरल्याण्डया खः । लाःबलाः न्ह्यः जक उत्तरी आयरल्याण्डया खुँतय् छगू पुचलं एटीएमं ध्यबा मखसे एटीएम मेशीन हे खुया यंकेत सफल जूगु दु । प्यम्हेसिया पुचलय् वःपिं इपिं खुँतय्सं मास्क पुना वयाः एटीएम मेशीन खुया काःगु खः । समाचार एजेन्सीतय्कथं खुँतय् उगु पुचलं एटीएम मेशीन खुइत क्रेन हे ज्वनाः वःगु खः ।

अले व हे क्रेनया ग्वाहालिं इमिसं एटीएम मेशीन खुया यंकूगु खः । खुँतय्सं गुगु थासय् च्वंगु एटीएम मेशीन खुया काःगु खः, उकिया लिक्कसं अन भवन दयेकेत प्रयोग यानातःगु क्रेन ज्वना वःगु खः । उगु क्रेन नं इमिसं खुया हे हःगु खः । सीसीटीभी फुटेजय् खने दुगु दृश्यकथं इमिसं दकलय् न्हापां एटीएम मेशीन तयातःगु थाय् च्वंगु पौ प्वाः खंगु खः ।

पौ प्वाः खने धुंकाः क्रेनया हे ग्वाहालिं इमिसं मेशीन पिने लिकायेत सफल जूगु खः । एटीएम मेशनी लिकया खतं इमिसं छगः खुल्ला कारय् मेशीन तयेत स्वःगु खःसां मेशीन तग्वः जूगुलिं मेशीन मन्ह्यंक हे कारय् तयाः बिसिउँ वंगु खः । उत्तरी आयरल्याण्डय् थुकथंया घटना लिपांगु इलय् अप्वयाच्वंगु संचार माध्यमतय्सं न्ह्यथंगु दुसा थुकियात पनेगु निंतिं प्रहरीं न्ह्याकाच्वंगु कुतः नं खास हे सफल जुइ फयाच्वंगु मदु ।