नेपालभाषाय् एमए ब्वनीपिं न्याम्हेसित यल महानगरपाखें पूवंक छात्रवृत्ति बीगु घोषणा

यल (नेपालभाषा टाइम्स)÷ यल महानगरपालिकाया मेयर चिरिबाबु महर्जनं पाटन क्याम्पसय् नेपालभाषा कयाः एमए याइपिं न्याम्ह विद्यार्थीपिंत शतप्रतिशत छात्रवृत्ति बीगु घोषणा यानादीगु दु । नेपालभाषा केन्द्रीय विभागया पीनिदँ बुन्हिया लसताय् सोमवाः जूगु ज्याझ्वलय् मूपाहाँ कथं झायादीम्ह मेयर महर्जनं थ्व खँ धयादीगु खः ।

ज्याझ्वलय् न्ववासें वय्कलं धयादीगु दु, ‘केन्द्रीय विभागं सिफारिस यानाहःकथं न्याम्हेसिया खर्च यल महानगरपालिका शतप्रतिशत व्यहोरे यायेगु जुइ ।’ अथेहे वय्कलं यलया थीथी थाय्या पुलांगु नां सम्बन्धी अनुसन्धान यायेगु निंतिं नं यल महानगरपालिकापाखें ग्वाहालि यायेगु बचं बियादीगु खः ।

केन्द्रीय विभागया प्रमुख डा. राजनलाल जोशीया सभापतित्वय् जूगु ज्याझ्वलय् पाटन कलेजय् नेपालभाषा कयाः ब्वंपिं विद्यार्थीपिंत पियुष पदक, सत्यहेरा सिरपाः, योगवीरसिंह अनुसन्धान वृत्ति, पुष्पादेवी छात्रवृत्ति, फैगुलि सिरपाः, श्रेष्ठ पदक नं लःल्हाःगु खः । न्हय्दँ न्ह्यवनिसें दिनाच्वंगु थुपिं सिरपाः ने.सं. ११३६ निसें ११४२ तकया विद्यार्थीपिंत लःल्हाःगु खः ।

पियुष पदक भरत महर्जन (ने.सं. ११३६), राजेन्द्र शाक्य (११३७), राकेश महर्जन (११३८), कविन श्रेष्ठ (११३९)यात लःल्हाःगु खः । अथेहे सत्यहेरा सिरपा शान्त महर्जन (ज्ञज्ञद्धज्ञ)यात, योगवीर सिं अनुसन्धान बृति राजेन्द्र शाक्य (११३७), अर्विन्द्रमान सिं (११३८), किरणकेन रंजित (११३९) यात, पुष्पदेवी छात्रवृति राजन श्रेष्ठ, सरिना रंजित, नितु डंगोल, सुदीप महर्जनयात, फैगुलि सिरपाः रामेश्वर श्रेष्ठयात व श्रेष्ठ पदक भरत महर्जन, सृष्टि श्रेष्ठ, नानीहेरा प्रजापति (११३६), राजेन्द्र शाक्य, तेजमाया महर्जन, पंकज नकर्मि, रामेश्वर श्रेष्ठ (११३७), राकेश महर्जन, सुजल वज्राचार्य, दर्शनवीर शाक्य (११३८), कविन श्रेष्ठ, कविना नेपाली, सिल्भा प्रधान (११३९) यात, सत्यहेरा अनुसन्धान सुभाय पौ रविन्द्र वज्राचार्य, प्रजित शाक्य, कृष्णप्यारी श्रेष्ठ व नवीन प्रकाश श्रेष्ठयात लःल्हाःगु खः ।

ज्याझ्वलय् पुष्पादेवी सिरपाःया दाता पञ्चवीरसिंह तुलाधरं थ्व सिरपाः निरन्तर यानातयेगु निंतिं न्यागू लाख तकाया अक्षयकोष नीस्वनेगु घोषणा यानादीगु खःसा प्रा. प्रकाश खड्गीं केन्द्रीय विभागया अक्षय कोषया निंतिं छगूलाख तका बीगु घोषणा नं याःगु खः । अथेहे ज्याझ्वलय् रविन श्रेष्ठं च्वयादीगु ‘समाज भाषाविज्ञानया छुं’ सफू व नेपालभाषा जर्नल नं विमोचन जूगु खः ।