दकलय् तजाःगु थासय् हिदान

येँ – लायन्स क्लब अफ काठमाडौं ब्लड सर्कलया ग्वसालय् विश्वया दकलय् तजाःगु थासय् हिदान यानाः छगू कीर्तिमान कायम याःगु दु । लायन्स क्लबं सोलुखुम्बुया सल्लेरीइ २,३५० मिटर च्वय् हिदान यानाः उगु कीर्तिमान कायम याःगु खः ।

क्लबं सोलुखुम्बुया सल्लेरीइ च्वंगु यो· स्टार क्लबलिसे सहकार्य यानाः उगु हिदान याःगु खः । ज्याझ्वलय् ७१ म्हेसिनं हिदान याःगु जानकारी क्लबं बिउगु दु ।

विश्वय् नेपाःयात थीथीकथं म्हसीका वयाच्वंगु खःसा आः वयाः हिदानया ल्याखं नं नेपाःयात म्हसीका कुतःकथं थुकथं दकलय् तजाःगु थासय् हिदान ज्याझ्वःया ग्वसाः ग्वयागु क्लबया चार्टर्ड प्रेसिडेन्ट अनिलरत्न तुलाधरं कनादिल । वय्कलं आः गिनिज बुक अफ वल्र्ड रेकर्डय् दुथ्याकेत पहल यायेगु नं कनादिल ।

विश्वया दकलय् तजाःगु च्वापुगुँ सगरमाथां नेपाःयात म्हसीका वयाच्वंगुलिं आः व हे थासय् विश्व कीर्तिमानी हिदान ज्याझ्वःया नं कीर्तिमान तयेगु थःपिनिगु कुतः जूगु वय्कलं धयादिल ।

तसकं ख्वाउँगु थाय्, ब्लड बैंक व आवश्यक प्राविधिक जनशक्ति तकं मदुगु थासय् हिदान यायेगु स्वयं हे चुनौतिपूर्ण जूसां सकसिगुं आवश्यक ग्वाहालिं हे थ्व ज्या ताःलाकेत सफल जूगु वय्कःया धापू दु ।

हिदान ज्याझ्वलय् सल्लेरीस्थित जनपथ, सशस्त्र प्रहरी, स्थानीय खेलकुद समितिलिसें मेमेगु संघसंस्थां नं सहकार्य याःगु खः । संकलन जूगु हि येँय्तक हयेगु निंतिं तारा एअरं आवश्यक ग्वाहालि याःगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु