किपुलिइ सामुदायिक भवनया निंतिं जग स्वनेज्या

किपू (नेपालभाषा टाइम्स) – किपू नगरपालिका वडा नं. ६ स्थित क्वाःर त्वालय् सामुदायिक भवन निर्माण याइगु जूगु दु । भवन निर्माणया निंतिं वंगु विहीवाः किपू नगरपालिकाया प्रमुख रमेश महर्जनं छगू ज्याझ्वःया दथुइ जग स्वनादीगु खः ।

जग स्वनेगु ज्याझ्वलय् किपू नगरपालिकाया प्रमुख महर्जनं न्हापा छगू सामान्य ट्रष्ट जक तयातःगु थासय् आः बहुउद्देश्यीय सामुदायिक भवन दयेकेधुकाः उगु भवन मात्र भ्वय् नयेगु निंतिं जक प्रयोग यायेगु मखसे न्हियान्हिथं थीथी गतिविधि व रचनात्मक क्रियाकलाप नं याना यंकेमाःगु खँय् बः बियादिल ।

विशेष यानाः भवन निर्माण लिपा ज्याथजिथिपिनिगु निंतिं ई छ्यायेत सहज वातावरण दयेमाःगु खँय् बः बियादिसें नगरप्रमुख महर्जनं धयादिल, ‘थुगु भवनय् थीथीकथंया ज्याखँ यानाः आय आर्जन जुइगु ज्याय् तकं प्रयोग याना यंकेमाः ।’

भवन निर्माण लिपा उकियात जीवन्त याना तयेगु व नियमित रुपं थीथी क्रियाकलाप यानाः भवनयात निरन्तर रुपं प्रयोग यानाच्वनेमाः धासें भवनय् विद्यार्थीतय्त कोचिङ, ट्युशन ब्वंकेगु, थीथी शिपमूलक तालिमनापं आय आर्जन जुइगु गतिविधि न्ह्याकेगु निंतिं भवनया प्रयोग यायेमाः धयादिल ।

किपू नगरपालिका वडा नं. ६ या वडाअध्यक्ष न्हुछेबहादुर महर्जनं नं नवानादीगु ज्याझ्वः स्थानीय जुजुभाई महर्जनया सभापतित्वय् जूगु खःसा ज्याझ्वलय् जनप्रतिनिधि लगायत आपालं स्थानीतय् सहभागिता दुगु खः ।