येँया ६९दँया संक्रमित कालधारा निवासी, निला न्ह्यः अष्ट्रेलियां लिहांवःम्ह

येँ – स्वास्थ्य तथा जनसंख्या मन्त्रालयं थौं थप १९म्ह मनूतय्त कोरोना भाइरसया संक्रमण जूगु पुष्टि यात । उकी मध्ये छम्ह येँया ६९दँया मिजं खः । उम्ह मिजं येँ महानगरपालिका वडा नम्बर १६ स्थित कालधारय् च्वनीम्ह खः ।

वय्कः चैत ३ गते अष्ट्रेलियां दुबई जुया नेपा: लिहांवःगु खँ वडाया अध्यक्ष मुकुन्द रिजालं नेपालभाषा टाइम्स यात धयादिल । अनं लिपा उम्ह संक्रमित गोरखा व चितवन नं वनाः वयेधुकूम्ह खः । अध्यक्ष रिजालया कथं येँ नापं गोरखा व चितवनय् नं छेँ दुम्ह वय्कः अष्ट्रेलियां लिहांवयेधुंकाः उखेपाखे वनाः वःम्ह खः ।

संक्रमित मनूयात टेकु अस्पतालया आइसोलेसनय् वास: याकेगु निंतिं छ्वयेधुनागु जानकारी बियादिसें अध्यक्ष रिजालं आः वय्कःया सम्पर्कय् वःपिन्त मालेगु ज्या जुयाच्वंगु धयादिल । संक्रमितया सम्पर्कय् वःपिं व नापं छेँ दुपिंत कन्हय् परीक्षण यायेगु तयारी जुयाच्वंगु दु ।