नेवाः हना सिरपाः लःल्हात

सक्व(नेपालभाषा टाइम्स)- भाषा साहित्य मुँज्या खलः सक्वं छगू ज्याझ्वःया दथुइ थुगुसीया ‘नेवाः हना सिरपाः–११४४’ लःल्हाःगु दु । वंगु शनिवाः सक्वय् जूगु छगू ज्याझ्वःया दथुइ दँय्दसं लःल्हाना वयाच्वंगु थुगुसी सिरपाः थुगुसी मांभाय् शिक्षाया अभियन्ता दीपक तुलाधरयात लःल्हाःगु खः ।

वंगु शनिवाः सक्वया समाइरा गार्डेन क्यबय् जूगु छगू ज्याझ्वःया दथुइ मू पाहां नेपालभाषा एकेदेमिया भाइस चान्सलरलिसें नेवाः न्ह्यलुवा मल्ल के. सुन्दरं उगु सिरपाः मातृभाषा शिक्षाया अभियन्ता लिसें ‘नेवाः वस्ती नेवाः स्कुल अभियान’या कजि तुलाधरयात लःल्हानादीगु खः । उगु सिरपाः न्यय्द्वः दां राशीया खः ।

उगु हे ज्याझ्वलय् फ्रेन्च च्वमि एन्टोइन डे सेन्ट एक्जुपेरीं अंग्रेजी च्वयादीगु व खलःया हे दुजः ज्ञानबहादुर श्रेष्ठं भाय् हिलादीगु सफू ‘मचाम्ह राजकुमार’या नं चिखिफ्यनेज्या जूगु खः ।

नेवाः बस्ती नेवा अभियानपाखें नेवाः वस्ती दुने नेवाः भासं आखः ब्वंकीगु निजी स्कुल चायेकेगु अभियान न्ह्याका वयाच्वनादीम्ह वय्कःया योगदानयात कयाः उगु सिरपाः लःल्हाःगु खः । भाजु तुलाधरं स्वनिगः दुने जक मखसे स्वनिगलं पिने नं नेवाः भासं आखः ब्वंकीगु स्कुल चायेकेत माःकथंया ग्वाहालि यायेगु याना वयाच्वनादीगु दु । अथे हे वय्कलं स्वनिगः दुनेया आपालं निजी स्कुलय् नं नेवाः भाय्या विषय ब्वंकेत इनाप यानाः नेपालभाषा ब्वंकेगु ज्याय् तिबः बिया वयाच्वनादीगु दु ।

थुगु सिरपाः आख्यानकार मथुरा साय्मि, वरिष्ठ कवि डा. योगेन्द्र प्रधान व वरिष्ठ समालोचक प्रा. नर्मदेश्वर प्रधानयात लःल्हायेधुंकूगु दु