दाहालयात कार्यकारी अध्यक्ष ? प्यंगू प्रदेशय् एमाले व निगुली माओवादी मुख्यमन्त्री

 

येँ – एमाले अध्यक्ष केपी ओली व माओवादी अध्यक्ष पुष्पकमल दाहाल दथुइ म्हिगः करिब साढे ३ घन्टा न्ह्याःगु वार्तापाखें पार्टी एकताया सवालय् पिहां वयाच्वंगु सम्पूर्ण भ्रम मदयेका छ्वयेत ताःलाःगु खँ सीदुगु दु । निम्ह नेताया दथुइ जूगु वार्ताय् पदया बाँडफाँड स्वयां नं आः थःपिं न्ह्याः वनेगु गय् यानाः धइगु विषयय् विशेष खँल्हाबल्हा जूगु खः । उगु इलय् एमाले अध्यक्ष ओलीं भविष्यय् थःपिं न्ह्याः वनेगु योजना बारे ब्रिफिङ यानादीगु व उकी दाहाल सहमत जूगु खँ सूत्रं धाःगु दु ।

वंगु छुं ई न्ह्यवंनिसें एमाले व माओवादी दथुइ पार्टी एकता मजुइगु खः लाकि धइगु हुइनाभुइना तकं वःगु खःसा वयां लिपा निम्ह शीर्ष नेतातय् दथुइ लगातार ‘वन टु वन’ वार्ता सुरु जूगु खः । थज्याःगु हुइनाभुइनां यानाः पार्टी एकता याकनं याना छ्वयेगु लागिं दबाब लाःवंगु खँ धाःगु दु । पार्टी एकता यायेबलय् एकीकृत पार्टीया शीर्ष पद गय् यानाः इनेगु धइगु खँय् दकले अप्वः विवाद जुयाच्वंगु खँ सूत्रं धाःगु दु । माओवादी अध्यक्ष दाहालं यदि ओली प्रधानमन्त्री जुइगु खःसा थःत पार्टी अध्यक्ष दयेकेमाः धकाः माग यानाच्वंगु दुसा एमालें आःयात सहअध्यक्ष व लिपा कार्यकारी अध्यक्ष दयेकेगु खँ न्ह्यःने हःगु दु । तरनिर्णय धाःसा याये मफुनि ।

अथे हे २ नम्बर बाहेक मेगु खुगू प्रदेशय् दयेकीगु सरकार मध्ये एमालें प्यंगू व माओवादीं प्रदेश ६ व ७ निगुली मुख्यमन्त्री दयेके खनीगु जूगु दु । लिसें निगू प्रदेशय् माओवादीया व प्यंंगू प्रदेशय् एमालेया सभामुख दइगु खँय् नं सहमति कायम याःगु दु । वाम गठबन्धनं दयेकीगु प्रदेश सरकारय् ११ म्ह स्वयां अप्वः मन्त्री मतयेगु निर्णय नं याःगु दु । फुक्कं प्रदेशय् मन्त्री जुइपिनि अनुपात धाःसा माओवादीया ३० व एमालेया ७० प्रतिशत जुइ । प्रदेशय् संविधानय् व्यवस्था यानातःगु स्वयां नं कम जक मन्त्री तयेत्यंगु खः ।

वाम गठबन्धनया शीर्ष नेतातय्सं संविधान संशोधन यायेत थःपिं तयार दु धकाः सार्वजनिक रुपं न्ववाना हःगु खँयात मधेसवादी दलतय्सं सकारात्मक रुपं काःगु दु । संघीय समाजवादी फोरमया अध्यक्ष उपेन्द्र यादवं संविधान संशोधन यायेत वाम गठबन्धन धाथें तयार खःसा एमालें थःगु अवधारणा छ्वया हजि धकाः इनाप यानादीगु दु । लिसें संविधान संशोधन यायेगु खःसा थःपिं वाम गठबन्धनया सरकारय् वने फइगु खँ नं यादवं कनादीगु दु । २ नम्बर प्रदेशय् फोरमया नेतृत्वय् हे सरकार गठन जुइगु व उकिया लागिं राजपालिसे सहमति जुइधुंकूगु खँ नं वय्कलं स्पष्ट यानादिल ।

सम्बन्धित बुखँ

LEAVE YOUR COMMENTS