समाजवादी पार्टी विरुद्ध गिरीया रिट

येँ (नेपालभाषा टाइम्स) – तत्कालीन समाजवादी पार्टीं कारवाही याःम्ह सांसद सरिता गिरीं पार्टीया विरोधय् सर्वोच्च अदालतय् रिट तःगु दु। गिरी तत्कालीन समाजवादी पार्टी, थौंकन्हय्या जनता समाजवादी पार्टी, प्रतिनिधिसभा, संसद सचिवालय, निर्वाचन आयोगयात विपक्षी दयेकाः रिट तःगु खः ।

पार्टीया अनुशासन व ह्वीप उल्लंघन याःगु धासें पार्टीं गिरीयात स्पष्टीकरण फ्वंगु खः । तर सन्तोषजनक लिसः मबिउ धासें पार्टीया साधारण दुजः व सांसद पदं तकं बर्खास्त यानाः कारवाही याःगु खः ।

रिटय् गिरीं समाजवादी पार्टीया केन्द्रीय समितिं यायेमाःगु निर्णय पार्टीया कार्यकारिणी कमिटीं याःगु जूगुलिं थ्व वैध मखु धकाः जिकिर यानादीगु दु। नेपाःया न्हूगु राजनीतिक नक्सा तयाः निशान छाप संशोधन यायेत सरकारं हःगुविधेयक लित कायेमाः धकाः सांसद गिरीं संसद सचिवालयय् प्रस्ताव दर्ता याःगु खः । पार्टीं वय्कःयात उगु प्रस्ताव लित का धकाः निर्देशन बिलं नं वय्कलं लित मकाःगु खः ।

सुनां सांसद दयेकूगु खः वं कारबाही याइ : नेता श्रेष्ठ
सांसद सरिता गिरीं पार्टी विरुद्ध तःगु उगु रिटया औचित्य मदुगु खँ जनता समाजवादी पार्टीया नेता लिसें सांसद राजेन्द्र श्रेष्ठं कनादीगु दु। सांसद गिरीं थःत केन्द्रीय समितिं मखुसें कार्यकारिणी कमिटीं कारबाही याःगु जूगुलिं थ्व वैध जुइ मखु धकाः मुद्दा दायर याःगु खः । तर नेताश्रेष्ठं धाःसा न्हापा गिरीयात केन्द्रीय समितिं मखुसें कार्यकारिणी समितिं हे सांसद ल्यःगु जूगुलिं आः कारबाही यायेगु ज्या नं कार्यकारिणी समितिं हे याःगु दावी यानादिल ।

‘नेपालभाषा टाइम्स’ लिसे खँ ल्हासें नेता श्रेष्ठं पार्टी विधानया धारा १७, २ (क) कथं सांसद गिरीयात कारबाही जूगु व उगु धाराय् केन्द्रीय समिति गठन मजुयाच्वंगु इलय् कार्यकारिणी समितिंनिर्णय याइ धकाः च्वयातःगु खँ स्पष्ट यानादिल ।

लिसें वय्कलं गिरीया मुद्दायातसर्वो च्चं याकनं फैसला यायेमाः धासें गिरी विरुद्ध देशद्रोहया मुद्दा न्ह्याकेमाःगु बिचाः नं तयादिल । वय्कलं धयादिल ‘गिरीया अभिव्यक्ति देशद्रोही खः, उकिं सर्वो च्च अदालतं देशद्रोहीया मुद्दा न्ह्याकेमाः ।’