सतक व सदन निथासं राजीनामा माग
येँ (नेपालभाषा टाइम्स) – सुनसरीया देवानगञ्जया कप्तानगञ्जय् वंगु आइतवाः जूगु सामान्य ल्वापुइ प्रहरीं गोली कयेकूगु घटनायात कयाः प्रधानमन्त्री व गृहमन्त्रीया राजीनामाया माग जूगु दु । म्हिगः सदन व सतक निथाय्सनं प्रधानमन्त्री बालेन शाह व गृहमन्त्री सुधन गुरुङ्गया राजीनामा फ्वंगु खः ।
म्हिगः बिराटनगरय् जूगु प्रदर्शनय् देवानगञ्जया घटनाय् सरकार संवेदनशील मजूगु धासें ल्याय्म्हतय्सं प्रधानमन्त्री शाह व गृहमन्त्री गुरुङं राजीनामा बीमाःगु माग याःगु खः । स्थानीय ल्याय्म्हतय्सं बजाः बन्द यानाः जिल्ला प्रशासन कार्यालय सुनसरी न्ह्यःने प्रदर्शन याःगु खः । उमिसं ‘बालेन सरकार मुर्दावाद’, ‘गृहमन्त्री सुदन गुरुङ्ग मुर्दाबाद’, ‘हत्यारा सरकार राजीनामा बिउ’ धयागु पर्चा ज्वनाः प्रदर्शन याःगु खः ।
मेखे म्हिगः सदनय् न्ववाःपिं प्रमुख प्रतिपक्षी दल कांग्रेस लिसें फुक्क धयाथें विपक्षी सांसदतय्सं नं प्रधानमन्त्री शाह व गृहमन्त्री गुरुङ्गया राजीनामा फ्वंगु दु । सदनय् न्ववाःपिंसं थुगु घटनाया फुक्क जिम्मेवारी सरकारं कायेमाःगु धासें प्रधानमन्त्री व गृहमन्त्रीं नैतिक जिम्मेवारी कयाः राजीनामा बीमाःगु माग याःगु खः ।
बैठकय् विशेष ईलय् न्ववासें कांग्रेसया प्रमुख सचेतक बासना थापां प्रधानमन्त्री शाह येँ मनपाया मेयर जुयाच्वंगु इलय् सामाजिक सञ्जालय् पोस्ट याःगु प्रसंगयात न्ह्यथँसें वर्तमान सरकारं नं सुनसरीया घटनाय् नैतिक जिम्मेवारी कयाः राजीनामा बीमाः धयादिल ।
वय्कलं धयादिल, ‘न्हापा छुं नं घटनाय् आक्रोस प्वंकाजुइपिं प्रधानमन्त्री व गृहमन्त्री थः नागरिकत सिनाच्वंसां छाय् मौन दु ? नागरिकतय् ज्यान वनीकथं गोली कयेकेमाःगु अवस्था गनं वल ? थुकिया लिसः सरकारं सदनय् बीमाः ।’
अथेहे एमालेया संसदीय दलया उपनेता पद्मा अर्यालं देशय् शान्ति सुरक्षा कायम यायेत व नागरिकत जिउधन रक्षा यायेत सरकार पूवंक असफल जूगु धासें न्हापा न्हापाया घटनाय् सरकारयात दोषी क्यनाः राजीनामा फ्वना जुइपिं हे आः सत्ता दुगु लुमंकुसें सुनसरीया घटनाय् प्रधानमन्त्री व गृहमन्त्रीं राजीनामा बीमाः धयादिल ।
अथेहे नेपाल कम्युनिष्ट पार्टीया सांसदगोपाल शर्मां सुनसरीया घटनाया बारे प्रधानमन्त्रीं संसदय् आधिकारिक जानकारी बीमाःगु माग यासें थज्याःगु संवेदनशील इलय् प्रधानमन्त्री थः हे उपस्थित जुयाः वस्तुस्थिति स्पष्ट यायेमाः धयादिल । अथेहे राष्ट्रिय प्रजातन्त्र पार्टीया प्रमुख सचेतक खुश्बु ओलीं देशय् धार्मिक असहिष्णुता तच्वःगु धासें सरकारया आलोचना यासें सुनसरी घटनाय् छानविनया निंतिं उच्चस्तरीय आयोग गठन यायेमाःग माग यानादिल ।
थ्वहे दथुइ जेनजीतय् छगू पुचः जेनजी मुभमेन्ट नेपालं गृहमन्त्री गुरुङया पृष्ठभूमि विवादास्पद जूगु व लिपांगु इलय् वय्कलं भ्रमण याःगु थासय् आकाझाकां हिंसात्मक द्वन्द्व न्यनावःगु धासें गृहमन्त्रीयात पदं चीकेत माग याःगु दु ।
जेनजी मुभमेन्टया प्रवक्ता विजय शाहं सही यानाः पिथँगु वक्तव्यय् सुनसरी जिल्लाय् मत स्यानाः गोली कयेकाः नागरिकतय् हत्या याःगु धासें राज्यपाखें हे देय्यात साम्प्रदायिक दंगापाखे यंकेगु ज्या जुयाच्वंगु द्वपं नं बियातःगु दु ।
गृहमन्त्री सुनसरीइ
होटलय् छापा मारे यायेगु ज्याय् तकं थः हे ब्वाँय् जुयाच्वंम्ह गृहमन्त्री सुधन गुरुङ मधेसय् अपाय्धंगु दंगा जुयाच्वंसां वास्ता मयासे च्वनाच्वंगु धयागु आलोचना जुइवं म्हिगः सुनसरी वनेगु तयारी याःगु दुु । सुनसरी वनेन्ह्यः गुरुङं प्रधानमन्त्री बालेन शाहलिसे नं सल्लाह याःगु खः । गृहमन्त्री गुरुङलिसे स्वास्थ्य मन्त्री निशा मेहतां सुनसरी घटनाय् लानाः सीपिं निम्हेसिया छेँजःपिं नापलाइगु खँ धाःगु दु ।
LEAVE YOUR COMMENTS