नेपालभाषा एकेदेमिया कविता कार्यशाला गोष्ठि
किपू(नेपालभाषा टाइम्स)- चिनाखँ विधाय् च्वसा न्ह्याका वयाच्वंपिं नेवाः मिसा साहित्यकारतय् श्रृजना व लेखनयात कयाः छगू कार्यशाला जुल । नेपालभाषा एकेदेमि साहित्य कवःया ग्वसालय् वंगु शनिवाः ‘सृजनात्मक च्वया व कविता कार्यशाला गोष्ठि’ ज्याझ्वः जूगु खः ।
होटल हिलसाइडय् जूगु ज्याझ्वलय् लसकुस यासें एकेदेमिया दुजःलिसें साहित्य कवःया कजि त्रिरत्न शाक्यं देशय् शासन व्यवस्थाय् हिउपाःया अनुभूति खस जाति छथ्वः बाहेकं नेवाःलिसें मेगु गुगुं नं जातिया साहित्य ख्यलं थुकिया अनुभूति याये खंगु मदु धयादिल । लिसें वय्कलं नेपालभाषा एकेदेमियात नं छुं नं ज्या यायेगुलिइ थाकुयाच्वंगु खँ कनादिल ।
संयोजन व सहजीकरण यानादीम्ह भाषाह्यमि डा. ज्योतिप्रभा तुलाधरं एकेदेमि थेंज्याःगु नेवाःतय् गौरवशाली प्राज्ञिक संस्थां छुं नं ज्या यायेत साधन स्रोतया अभाव जुयाच्वंगु धइगु खँ न्यने मात्रं नुगःमछिंसे च्वं धासें थुकथंया नेपालभाषाया न्हूपिं व पुलांपिं कवयित्रीपिंत छगू हे थासय् मुंंकाः कार्यशाला ग्वसाः ग्वःगु च्वछायेबहजू धयादिल ।
नेपालभाषाया नांजाःम्ह कवयित्री मय्जु प्रतिसरा साय्मिं छम्ह मिसा स्रष्टाया जीवनय् वयाच्वनीगु हाथ्या व सृजनाया वयागु निरन्तरताया बारे थःगु नुगःखँ तयादीगु खः ।
नांजाःम्ह ल्याय्म्हम्ह कवि नापं नेपालभाषा टाइम्स न्हिपौया सम्पादक सुरेश किरण मानधरं आधुनिक चिनाखँया विषयवस्तु व प्रस्तुतिकरणया बारे व साहित्यकार रमेशकाजी स्थापितं चिनाखँय् दयेमाःगु ध्वनि, छन्द व लय् बारे नुगःखँ तयादीगु खः ।
मुँज्याया न्हापांगु चरणय् ब्वति कयादीपिं सकसिनं नेपालभाषाया चिनाखँया विधा मदिक्क विकासया लँपुइ न्ह्याना च्वने फयेमा धकाः मत थियाः पाः फयेकेगु ज्या जूगु खः । न्हापांगु चरणया ज्याझ्वलय् एकेदेमिया भाइस चान्सलरलिसें नेवाः न्ह्यलुवा मल्ल के. सुन्दर, एदेमिया सदस्य सचिव नापं साहित्यकार डा. पुष्पराज राजकर्णिकारलिसें दुजःपिनिगु उपस्थिति दुगु खः ।
सह संयोजक कवयित्री रजनी मिलां सृजनात्मक च्वज्याय् चिनाखँया सृजना, चिनाखँया रुप व चिनाखँय् दयेमाःगु तत्वया बारे कनादीगु ज्याझ्वलय् रश्मि नापित, शोभा महर्जन, हिसिलिना शाक्य, शिमला शर्मा, मिनर्भा शर्मा लगायत आपालं न्हूपिं व पुलांपिं मिसा साहित्यकारपिनिगु उपस्थिति दुगु खः । थ्व हे झ्वलय् याकनं हे मिसा च्वमिपिनिगु चिनाखँ मुना ज्याझ्वः याइगु जूगुु दु ।
LEAVE YOUR COMMENTS