डिजिटल नक्साय् मध्यपुर थिमि
मध्यपुर थिमि नगरपालिकां बहुउपयोगी डिजिटल प्रविधिइ आधारित नक्सांकन व छेँखाया सर्वेक्षण याइगु जूगु दु । नगरपालिका क्षेत्र दुनेया दक्वं छेँ, सम्पदा, देगः, खुल्ला क्षेत्र, बस्ती, सतक लगायतया नगरया सचित्र पिज्वइकथंया नक्सांकन यायेत्यंगु खः ।
नगरपालिका प्रमुख मदनसुन्दर श्रेष्ठं थ्व हे माघ २६ गते नगरपालिका क्षेत्रया पुलांगु व परम्परागत बस्तीया रुपय् दयाच्वंगु बालकुमारि, चपाच्व, नगदेय् व बोडेय् नक्सांकनया निंतिं ड्रोन क्यामरा ब्वयेकेगु धयादिल ।
‘छेँखाया नम्बरिङया बेसम्याप तयार जुइधुंकूगु दु, थ्री डी नक्सांकनय् वनेगु योजना दु’, वय्कलं धयादिल, ‘नगरपालिकापाखें दक्वं क्षेत्रया दक्वं छेँखालिसें सकतां संरचना स्वये फइ कथं नक्सांकन यानाः हाउस नम्बरिङय् तकं वनेगु जुइ ।’ वय्कलं मध्यपुर थिमिया परम्परागत नां व पहिचानयात हुयाछ्वये कथं त्वाः त्वाःया नां लाक्वपाक्व धंगु नां तयेगु ज्या जुयाच्वंगु खँय् आपत्ति प्वंकादिसें उकियात तकं व्यवस्थित याना वनेगु व परम्परागत नां व पहिचानयात कायम यााः नामाकरण याना वनेगु जुइ धयादिल ।
त्वाःया नामाकरणया सन्दर्भय् वडापाखें सिफारिस संकलन यानाः त्वाः, सतक लगायतया नगरसभापाखें हे पारित यानाः स्थायी रुपं नामाकरण यायेगु खँ न्ह्यथँसें वय्कलं न्हूगु बस्तीं तयातःगु त्वाःया ना तकं पुलांगु हे नां दुथ्याका यंकेगु जुइ धयादिल ।
नगरपालिकाया प्रशासकीय अधिकृत कमल ज्ञवालीं नगरपालिकां हरेक नागरिकया वासस्थान व नागरिकयात म्हसीके फयेमा, प्रत्येक व्यक्तिया छेँ, नगर दुनेया दक्वं संरचना, सतक, देगः, फल्चा, सतः नगरपालिकापाखें हे स्वये फयेमा, नागरिकं नक्सा पास यानातःगु दु वा मदु, कर पुला तःगु दु वा मदु, नगरपालिकापाखें हे सकतां स्वये फइकथं नक्सांकन याये त्यनागु धयादिल ।
वय्कलं धयादिल, ‘सरकारं न्ह्यःने हःगु राष्ट्रिय परिचय पत्र वितरणया ज्याय् स्थानीय तहं नं थुकियात लगाू यायेवं छम्ह मनूया छेँ गुलि थासय् दु, जग्गा, जमिन गन गन दु, धइगु व्यक्तिगत तथ्यांक तकं स्वये फइकथं सिस्टम दयेकाः यंकेत स्वयाच्वनागु खः, थुकिं नगरया समग्र विकासय् तिबः जू वनी ।’
वय्कलं नक्सांकन व सर्वेक्षणं न्हूपिं जन्म जूपिंनिसें मदये धुंकूपिनिगु तकया तथ्यांक तत्काल तये फइगु, छु गुगु त्वालय् ग्वःसा छेँ दु, गुलि जनसंख्या दु, सामाजिक सुरक्षा, शिक्षा व स्वास्थ्यया अवस्था छु दु धइगु नं सहज रुपं हे जानकारी काये फइकथंया तयारी जुयाच्वंगु धयादिल ।
नक्सांकन व सर्वेक्षण सिधये धुकाः नगरपालिकाया पहिचान पिज्वइकथं नागरिकयात म्हसीका पौ नं बिया वनेगु व नगरपालिकाया गुगुं नं सुचं प्रवाह यायेमाल धाःसा सकलें नागरिकयाथाय् तक छक्वलं थ्यनीकथं डिजिटल प्रविधिपाखें सुचं प्रवाह यायेकथंया व्यवस्थापन यायेगु ज्ञवालीं कनादिल ।वइगु आर्थिक दँ ०७५-०७६ या खुलाया अवधि दुने कार्यान्वयनय् हयेकथं ज्या जुयाच्वंगु वय्कःया धापू दु ।
LEAVE YOUR COMMENTS