ने. सं. ११४६ दिल्लागा दुतिया -

इरानय् अमेरिकाया न्हूगु आक्रमण

एजेन्सी – अमेरिकां इरानय् हाकनं आक्रमण याःगु दु । अमेरिकी सेनां इरानय् न्हूगु आक्रमण शुरु यानागु दावी याःगु खः । अमेरिकी सेन्ट्रल कमान्ड सेन्टकमं थ्व सम्बन्धय् सामाजिक संजालय् एक्सय् छगू पोस्ट यासें पश्चिम एशियाय् च्वंगु अमेरिकी सैनिकयात इरानं आकाझाकां आक्रमण याःगु व उकिया लिसलय् थःपिंसं नं आक्रमण यानागु धयातःगु दु ।

सेन्टकमं च्वःगु पोस्टय् धयातःगु दु, ‘थ्व आक्रमण मंगलवाः जोर्डनय् च्वंगु अमेरिकी सैन्य आधार व होर्मुज जलमार्गय् च्वंगु अमेरिकी जहाजयात लक्षित यानाः इरानं याःगु गोलीबारीया थ्व ‘कडा लिसः’ खः ।’

थ्व स्वयां छन्हु न्ह्यः जक निगू देय्या द्वन्द्वया दायरा तब्या जूगु खः । अमेरिका व साउदी अरबं सार्वजनिक रुपं हे इरानय् सैन्य आक्रमण याःगु खःसा वयां छन्हु लिपा हे अमेरिकां न्हूगु सैन्य आक्रमण याःगु खः । अमेरिका व साउदी अरबं इराकय् दुपिं इरान समर्थक पुचःयात लक्षित यानाः आक्रमण याःगु खः ।

अमेरिका व इजरायल जानाः इरानय् आक्रमण याःगु नं न्याला फुइधुंकूगु दु । न्याला न्ह्यः फेब्रुअरी २८ कुन्हु युद्ध शुरु जूगु खः । उगु इलय् अमेरिकी राष्ट्रपति डोनाल्ड ट्रम्पं ‘थ्व युद्ध छुं दिं वा हप्ताया दुने क्वचाइ’ धाःगु खः । युद्ध शुरु जूगु न्याला दयेधुंकूगु अवस्थाय् थ्व युद्ध याकनं क्वचाइगु छुं छाँटकाँट खने दयाच्वंगु मदु ।

वंगु बुधवाः छम्ह अमेरिकी उच्च अधिकारीयात उद्धृत यासें ‘एक्सयोसं’ अमेरिकी राष्ट्रपति ट्रम्पं साउदी अरेबियाया रक्षामन्त्री प्रिन्स खालिद बिन अल सलमानलिसे भेटवार्ता याःगु छगू समाचारय् च्वःगु खः ।

उम्ह अधिकारीयाकथं साउदी रक्षामन्त्री सलमानं साउदी अरब मध्यपूर्वया युद्धया तनाव म्हो यायेत स्वयाच्वनागु धाःगु खः।