ने. सं. ११४६ दिल्लागा दुतिया -

युक्रेन रुसया हमला जारी, थीथी थासय् जूगु आक्रमणय् च्याम्ह सित

किभ – रुसं विहीवाः सुथय् युक्रेनया थीथी थासय् व्यापक क्षेप्यास्त्र व ड्रोन आक्रमण याःगु दु । रुसं याःगु लिपांगु आक्रमणय् म्होतिं नं च्याम्ह सीगु दुसा छगू दर्जनं मल्याक घाःपाः जूगु दु । युक्रेनी राष्ट्रपति भोलोदिमिर जेलेन्स्कीं रुसं तःधंगु आक्रमणया तयारी यानाच्वनागु धकाः ख्याच्वः बिउगु छुं घौ लिपा हे थ्व आक्रमण जूगु धाःगु दु ।

स्थानीय अधिकारीतय्सं बिउगु जानकारीकथं मध्य युक्रेनया क्रिभी रिह लिक्क लाःगु छगू गांया छखा छेँय् ब्यालिस्टिक क्षेप्यास्त्र कुतं वनाः प्यम्ह वस्यक, ५ दँ व १२ दँ दुपिं निम्ह मिसा मस्तलिसें खुम्ह सीगु खःसा मेपिं च्याम्ह घाःपाः जूगु दु ।

क्रिभी रिह रक्षा परिषद्ं क्षेप्यास्त्र कुतुं वंगु थासय्भग्नावशेष चिइकेगु ज्या जुयाच्वंगुलिं सीपिनिगु ल्याः अप्वयेफुगु धाःगु दु । अथेहे पूर्वी पोल्टावा क्षेत्रय् जूगु ड्रोन आक्रमणय् नं छम्ह मनू सीगु दु । पोल्टावाय् जूगु आक्रमणय् गोदामय् ज्या यानाच्वंम्ह छम्ह सीगु खःसा पश्चिमी सहर ल्भिभय् जूगु मेगु आक्रमणय् म्होतिं नं १५ म्ह घाःपाः जूगु दु ।

थुखे राजधानी किभय् नं रुसं ब्यालिस्टिक क्षेप्यास्त्र प्रहार याःगु अधिकारीतय्स धाःगु दु । सहरया सैन्य प्रशासनयाकथं किभय् जूगु आक्रमणय् छम्ह मनू सीगु दुसा निम्ह घाःपाः जूगु दु । राजधानी किभया मेयर भिटाली क्लिट्स्कों सहरया थीथी थासय् मि नयाच्वंगु व थप आक्रमणया खतरा दुगु धासें नागरिकतय्त सुरक्षित थासय् च्वनेत इनाप नं याःगु दु । थुकथं हे किभया पूर्वी क्षेत्रय् नं मेगु आक्रमण जूगुलिइ थप न्याम्ह घाःपाः जूगु दु ।

युक्रेनया राष्ट्रपति जेलेन्स्कीं बुधवाः बहनि जक सामाजिक संजाल एक्सपाखें रुसं तःधंगु आक्रमणया तयारी यायेधुंकूगु धासे देय्न्यंकंया हवाई आक्रमणया ख्याच्वःयात गम्भिरतापूर्वक कायेत नागरिकतय्त इनाप याःगु खः । जेलेन्स्कीं युक्रेनया साझेदार देय्लिसे हवाई प्रतिरक्षा प्रणालीया निंतिं आवश्यक क्षेप्यास्त्र उपलब्ध याकेत नं हाकनं इनाप याःगु दु ।

जेलेन्स्कीं वंगु मंगलवाः जक अमेरिकी राष्ट्रपति डोनाल्ड ट्रम्पलिसे भेटवार्ता यासें युक्रेनय् हे प्याट्रियट इन्टरसेप्टर क्षेप्यास्त्र उत्पादन यायेगु सम्भावना बारे सहलह याःगु खः । थ्व सम्बन्धय् ट्रम्पं उगु क्षेप्यास्त्र प्रणाली उत्पादन बारे अनुमति बीत सकारात्मक जूगु जेलेन्स्कीं धाःगु दु ।

थ्व इलय् युक्रेनं प्याट्रियट पीएसी ३ इन्टरसेप्टर क्षेप्यास्त्रया अभावया सामना यानाच्वंगु दुसा वंगु फेब्रुअरीइ अमेरिका व इजरायलं इरान विरुद्ध शुरु याःगु युद्ध लिपा थुगु प्रणालीया माग विश्वव्यापी रुपं अप्वया वनाच्वंगु दु । गुकिं यानाः थुकिया आपूर्ति तसकं थाकूगु अवस्थाय् थ्यनाच्वंगु दु ।