गंगालाल अस्पतालय् न्ह्यम्ह संक्रमित, आकस्मिक बाहेक दक्वं सेवा बन्द

येँ- गंगालाल राष्ट्रिय हृदय रोग केन्द्र बाँसबारीइ उपचारया निंतिं वःपिं ल्वगितय्के कोरोना संक्रमण लूगु दु । म्हिगः अस्पतालया इमर्जेन्सीइ हःपिं नीन्याम्ह मध्ये न्हय्म्हेसिके कोरोना संक्रमण खनेदुगु खः । इर्मजेन्सीइ हःपिंत कोरोना संक्रमण लुइवं अस्पतालया चिकित्सक व नर्सतय्त नं क्वारेन्टाइनय् तयेमाःगु खँ अस्पतालं धाःगु दु । वंगु असार १५ गते नं निम्हेसिके कोरोना संक्रमण खनेदुगु खःसा उमित येँया मेगु हे अस्पतालय् छ्वयाः आइसोलेसनय् तःगु खः ।

म्हिगः आकाझाकां न्हय्म्हेसिके कोरोना संक्रमण लुइवं अस्पताल दुने छगू कथं आतकं ब्वलंगु खः । अस्पतालय् कोरोना संक्रमित बिरामी वयेवं थनिं निसें अस्पतालया इमर्जेन्सी बाहेक फुक्कं सेवा बन्द जुइगु सुचं नं म्हिगः हे अस्पताल प्रशासनं तिकूगु दु । म्हिगः संक्रमित खनेदुपिंत बिस्कं जनरल वार्डय् तयातःगु दु । उमित मेगु आइसोलेसन दुगु अस्पतालय् रिफर यायेगु तयारी जुयाच्वंगु दु ।

गंगालाल राष्ट्रिय हृदय केन्द्रय् आइसोलेसन वार्ड मदुगुलिं म्हिगः संक्रमित जूपिंत मेगु अस्पतालय् छ्वयेगु तयारी जूगु खः । तर गन छ्वयेगु धइगु बारे निर्णय मजूनिगु खँ सीदुगु दु ।

मेखे अस्पतालय् न्हापा हे भर्ना यानातःपिंत नं धमाधम डिस्चार्ज यानाः छेँय् छ्वयेगु सुरु याःगु दु । अस्पतालया चिकित्सकतय्सं आः छेँय् स्वयां अस्पतालय् खतरा खनेदत धाधां डिस्चार्ज यानाच्वंगु खः ।

न्हय्म्हेसित छक्वलं कोरोना खनेदयेवं चिकित्सक व नर्सत नं आतंकित जुयाच्वंगु दु । अस्पतालया आइसीयु, वार्ड आदि फुक्कं सिल यानाः अन सम्बन्धित बाहेक मेपिं नर्सतय्त तकं दुमछ्वये धुंकूगु दु । नर्सत नं थःपिंत नं कोरोना जुइ धयागु ग्याःचिकं थःपिनिगु परीक्षण व च्वनेगु व्यवस्था यायेत नं ब्वाँय् जुयाच्वंगुलिं अस्पतालय् थ्यनाच्वंपिं विरामीतय्सं नं बांलाक सेवा काये फयाच्वंगु मदु ।

सम्बन्धित बुखँ

LEAVE YOUR COMMENTS