राष्ट्रपति चुनावय् चीन नं सक्रिय

येँ (नेपालभाषा टाइम्स)- राष्ट्रपति निर्वाचन सतिना वःलिसे चिनियाँ राजदूत नं सक्रिय जुया वःगु दु । चिनिया राजदूत छन् सङं राष्ट्रपति चुनाव सतिना वयेवं थःगु सक्रियता अप्वयेकूगु खः । थ्व झ्वलय् वय्कलं म्हिगः प्रधानमन्त्री पुष्पकमल दाहालयात नापलानादीगु खःसा वयां लिपा नेकपा (एस) या अध्यक्ष माधव नेपालयात नं नापलानादीगु दु ।

नेपाः वयेधुंकाः राजदूत सङं प्रम दाहालयात नापलाःगु निक्वःखुसी खः । थ्व स्वयां न्ह्यः वंगु माघ २ गते वय्कलं दाहालयात नापलानादीगु खः । वय्कलं थ्वहे वइगु चैत १४ गते निसें १७ गते तक चीनय् जुइगु बोआओ फोरमया बैठकय् ब्वति कायेत ब्वनापौ बीगु निंतिं प्रम दाहाल नापलानागु धाःसां नं सूत्रं धाःसा थ्व स्वयां न्ह्यः हे उकिया ब्वनापौ वयेधुंकूगु व उकी नेपाःपाखें ब्वति कायेगु वा मकायेगु धकाः सरकारं निर्णय मयाःनिगु खँ धाःगु दु ।

उकिं चिनियाँ राजदूतं ब्वनापौ बीत प्रम दाहाल नापलाःगु धाःसां नं वय्कःपिनि दथुइ राष्ट्रपतिया चुनाव सन्दर्भय् हे नापलायेज्या जूगु खँ सूत्रं धाःगु दु । राजदूत सङं शुक्रवाः तिनि एमाले अध्यक्ष केपी शर्मायात नं नापलानादीगु खः ।

म्हिगः हे राजदूत सङं नेकपा (एस) या अध्यक्ष माधव नेपाल नापलानादीगु खः । अध्यक्ष नेपालया कोटेश्वरय् च्वंगु छेँय् वनाः राजदूत सङं नेपाललिसे खँल्हाबल्हा यानादीगु खः । वय्कःपिनि दथुइ नं राष्ट्रपति चुनावया बारे सहलह जूगु खँ धाःगु दु । भावी राष्ट्रपतिया रुपय् माधव नेपालया नां नं न्ह्यःने वयेवं चिनियाँ राजदूतं नापलाःगु अनुमान याःगु दु ।

थ्व स्वयां न्ह्यः नेपाःया राष्ट्रपति निर्वाचनय् भारत व अमेरिकां सक्रियता क्यना वयाच्वंगु खःसा आः वयाः चीनं नं थःगु सक्रियता क्यना हःगु अनुमान याःगु दु ।

वंगु फागुन १ व २ गते नेपाः भ्रमणय् वःम्ह भारतीय विदेश सचिव विनयमोहन क्वात्रां नं राष्ट्रपति चुनाव बारे विशेष रुचि क्यना वंगु खः । वय्कलं उगु इलय् प्रधानमन्त्री पुष्पकमल दाहाललिसे निघौ तक ‘वान टु वान’ वार्ता यानादीगु खः । भारतीय विदेश सचिवं राष्ट्रपति चुनावया लागिं धकाः नां समेत प्रस्ताव यानादीगु खँ पिहां वयाच्वंगु दु ।

अथे हे छुं न्हि न्ह्यः तिनि भारतय् नेपालविद् धकाः म्हसिउम्ह प्राध्यापक एसडी मुनिं नं छगू ट्विट यासें नेपाःया राष्ट्रपति यायेबहःपिं धकाः प्यम्ह मनूया नां प्रस्तावित यानादीगु खः । थुकिं यानाः नं चिनियाँ पक्षयात हथाय् चायेकूगु अनुमान यानाहःगु दु ।

थ्व स्वयां न्ह्यः चीनं एमाले व माओवादीयात छप्पँ यानाः नेकपा दयेकेगु झ्वलय् नं गहन सक्रियता क्यंगु खः । उगु इलय् तत्कालीन राजदूत होउ यान्छी सक्रिय जूगु खः । नेकपा विभाजन जुइ न्ह्यः नं राजदूत यान्छी सक्रिय जूगु खःसा नं नेकपायात ताःई तक एकीकृत याना तयेगु ज्याय् सफल धाःसा जुइ मफुत ।

माधव व सुवासया नां प्रस्ताव
नेकपा एमालेया अध्यक्ष केपी शर्मा ओलीं राष्ट्रपतिया नितिं नेकपा एसया अध्यक्ष माधव नेपाल व एमालेया उपाध्यक्ष सुवास नेम्वाङया नां प्रधानमन्त्री पुष्पकमल दाहालयात प्रस्ताव यानादीगु खँ धाःगु दु । अध्यक्ष ओलीं दाहालयात नां प्रस्ताव यायेगु झ्वलय् नेकपा एसया अध्यक्षयात संकेत यासें धयादिल, ‘छिं नं वचन बिउम्ह, कांग्रेसं नं ग्वाहालि याना वयाच्वंम्ह व्यक्तियात एमालें प्रस्ताव याइ ।’

लिसलय् प्रधानमन्त्री दाहालं जनता समाजवादी पार्टी व लोकतान्त्रिक समाजवादी पार्टी लिसे सहलह यानाः लिसः बीगु खँ धयादीगु खः ।