स्वनिगःया मेयरपिनि मंकाः फोरम

येँ- स्वनिगःया नगर लागाय् सिर्जना जुयाच्वंगु थीथी समस्याया मंकाः रुपं समाधान यायेगु लागिं स्वंगुलिं जिल्लाया फुक्कं नगरपालिकात छथाय् च्वनाः छगू फोरम गठन याःगु दु । स्वनिगःया १८ गू नगरपालिकाया मेयर व उपमेयरपिं वंगु शनिवाः नगरकोटय् छगू भेला यासें येँ महानगरपालिकाया मेयर विद्यासुन्दर शाक्यया अध्यक्षताय् उगु फोरम गठन याःगु खः ।

स्वनिगःया थ्व फुक्क हे नगरपालिकाय् थौंकन्हय् समान कथंया समस्यात ब्वलनाच्वंगु जुयाः उकिया समाधान मंकाः कथं हे याना वनेगु ताः तयाः येँ महानगरया नेतृत्वय् उगु फोरम दयेकूगु खः । आःयात ‘उपत्यकाव्यापी नगरपालिका फोरम’ धइगु नां तयाः गठन याःगु उगु संस्था गनं दर्ता धाःसा जुइ मखु । समस्यायात मंकाः रुपं समाधान याना वनेगु छथाय् च्वनेत दयेकूगु सामान्य पुचः जक जूगु खँ धाःगु दु ।

थुकिया उपाध्यक्ष पदय् यल महानगरपालिकाया मेयर चिरिबाबु महर्जन च्वनादीगु दुसा सचिवया रुपय् मध्यपुर थिमि नगरपालिकाया मेयर मदनसुन्दर श्रेष्ठ च्वनादीगु दु । स्वनिगः दुने विशेष यानाः फोहोरया व्यवस्थापन, स्यनाच्वंगु सतक, सतकय् ब्वइगु धू, लः, यातायात, सांस्कृतिक सम्पदा, पर्यटन व्यवसायया सम्बद्र्धन आदि थेंज्याःगु समस्या फुक्कसित समान कथं हे वयाच्वंगु जूगुलिं उकिया समाधान नं सकलें जानाः हे यायेमाः धइगु खँ पिदंगु खः ।

मेयर उपमेयरपिनि उगु भेलाय् येँया झिंछगू,यलया प्यंगू व ख्वपया स्वंगू नगरपालिकां ब्वति काःगु खः । ख्वप नगरपालिकापाखें धाःसा सुं प्रतिनिधि मवःगु खँ सीदुगु दु । स्वनिगःया नगरय् वयाच्वंगु थीथी समस्यायात मंकाः रुपं समाधान याना वनेत थुकथंया स्वनिगःव्यापी नगरपालिका छधी जुइ माली धइगु खँ छुं ई न्ह्यवंनिसें पिहां वयाच्वंगु खः ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः