बालं च्वनीपिंपाखें छेँथुवाः पीडित
येँ -येँय् छेँ दुम्ह छम्ह स्थानीय छेँथुवाःयात जातीय भेदभाव याःगु द्वपं बियाः प्रहरीइ उजुरी तयेवं पिहां वःगु विवाद लिपा स्वनिगः पिनें वयाच्वंपिं मनूतय्सं येँया छेँथुवाःत सामन्ती हे खः थें धकाः बिचाः यानाच्वंसां वास्तवय् येँय् च्वंपिं छेँथुवाःत बालं च्वनीपिं मनूतपाखें गुलि पीडित जुयाच्वंगु दु धइगु खँ येँ मनपाय् नकतिनि पेश जूगु छगू प्रतिवेदनं प्रस्ट याःगु दु ।
येँ मनपाया न्यायिक समितिं नगर सभाय् नकतिनि न्ह्यब्वःगु थःपिनि प्रतिवेदनय् थुगुसी नं बालं च्वनीपिंपाखें पीडित जूपिं आपालं स्थानीय छेँथुवाःतय् उजुरी वःगु खँ न्ह्यथनातःगु दु । समितिया प्रतिवेदनय् धयातः कथं आर्थिक वर्ष २०७६÷७७ य् समितिइ मुक्कं १२८ गू उजुरी वःगु दु । उकी मध्ये दकलय् अप्वः उजुरी हे बालं च्वनीपिंपाखें पीडित छेँथुवाःतय्गु दु । १२८ गू उजुरी मध्ये ४५ गू उजुरी क्वथा खाली याकेगु सम्बन्धी दु । क्वथाय् तालं ग्वयाः बाः समेत मबिसे बेपत्ता जुयाच्वंपिं डेरावालया क्वथा खाली याके बी माल धकाः अज्याःगु महानगरपालिय् अज्याःगु उजुरी लाःगु खः । लांलां तक नं बाः मपुसे च्वनाच्वंपिं डेरावालतय्गु क्वथा चायेकाः स्वयेगु लागिं नं छेँथुवालं मनपाय् उजुरी तयाः जक ज्या न्ह्याके दइ ।
उकथं हे लांलां तक बाः मबिउगुलिं बालं च्वंपिंके बाः उठे याना बी धकाः नं मनपाय् आपालं उजुरी लानाच्वंगु दु । कुल १२८ गू मध्य् १० गू उजुरी बाः उठे याना बी धइगु दु । छेँथुवाःयात बाः बिउगु मखु, क्वथा नं त्वःता बिउगु मखु, उकिं कायल जुयाः छेँथुवालं मनपाय् वयाः उजुरी तइगु खः ।
मनपाय् दकलय् अप्वः वइगु उजुरी मूलतः थुकथंया खः । थ्व बाहेक मेगु अप्वः वइगु उजुरी धइगु लँ चायेका बी माल धइगु खः ।
उकथं हे आ.व. २०७६÷७७ पाखें ल्ह्यया वःगु व आ.व. २०७७÷७८ समेतयागु मुक्कं ल्याः तयेबलय् येँ मनपाय् मुक्कं २८३ गू उजुरी दर्ता जुयाच्वंगु दु । उकी क्वथा खाली याका बी माल धकाः लानाच्वंगु उजुरीया ल्याः १४० गू दु । थ्व धइगु मनपाय् वइगु मुक्कं उजुरीया करिब बछि खः ।
मनपाय् थज्याःगु उजुरी यक्व वःगुपाखें हे सीदु कि येँ देय्या छेँथुवाःत वास्तवय् बालं च्वनीपिं मनूतपाखें गुलि पीडित जुयाच्वंगु दु । पिनें वइपिंसं स्वयेबलय् स्वनिगःया छेँथुवाःतय्सं बालं कयाः यक्व सुविधा भोग यानाच्वं थें खने दुसां छेँथुवाःत बालं च्वनीपिंपाखें गुलि पीडित धयागु खँ धाःसा उलि पिहां वयेगु मयाः ।
थौंकन्हय् लकडाउनया कारणं छेँ त्वःताः गामय् वंपिं मनूत लिहां हे मवःगु व उमिसं क्वथा नं मत्वःतूगु कारणं यानाः छेँथुवाःत अझ अप्वः मर्काय् लानाच्वंगु खँ धाःगु दु । मनपाय् वइगु थज्याःगु फुक्कं उजुरीया तुरुन्त निरुपण नं जुइ मखु । उकिया लागिं थीथी कथंया प्रक्रिया न्ह्याके मालीगु आवश्यक जुयाच्वनी ।
न्यायिक समितिया संयोजक लिसें उपप्रमुख हरिप्रभा खड्गी श्रेष्ठया उजं कथं समितिया दुजः सरोज ढकालं उगु प्रतिवेदन न्ह्यब्वयादीगु खः ।
LEAVE YOUR COMMENTS