साहित्य मन्दिरं डा. वैद्य हना

ख्वप- नेपाल साहित्य मन्दिरं शुक्रवाः छगू ज्याझ्वःया दथुइ नेपालभाषा विषय कयाः न्हापांखुसी विद्यावारिधि यानादीम्ह डा. जनकलाल बैद्यःयात आरवी फाउण्डेशनं बीगु सिरपाः लःल्हात । दाता राजाराम जोशीपाखें दां सिरपाः सहित नेपालभाषा एकेडेमीया चान्सलर चित्तरञ्जन नेपालीं उगु सिरपाः लःल्हानादीगु खः ।

ज्याझ्वःया मूपाहां भाजु नेपालीं ख्वपया पीनिम्ह बाखं च्वमिपिनि बाखं संग्रह मतया प्यंगूगु ब्व नं विमोचन यानादिल । विमोचित सफूयात कयाः मल्ल के. सुन्दरं समीक्षा यानादीगु खः । नेपाल साहित्य मन्दिरया नायः तिलक प्रकाश कायस्थया सभापतित्वय् जूगु ज्याझ्वलय् हर्षलाल लुमन्ति सिरपाःया दाता कृष्णलाल प्रधान लगायत हरिशरण शर्मा, अगिब बनेपाली व सुमा श्रेष्ठपिंसं नं नुगःखँ कनादीगु खः ।