लण्डनय् तःजिक यःमरि पुन्हि हन

येँ – पासा पुचः गुथि युके लन्दनं यःमरि पुन्हि हंगु दु । वंगु थिंलाथ्व पुन्हि (यःमरि पुन्हि)कुन्हु उगु ज्याझ्वः याःगु खः । संस्थाया ग्वसालय् निक्वःखुसी यःमरि पुन्हिया ज्याझ्वः जूगु खः । सछि स्वयां अप्वः मनूतय् सहभागिता दुगु ज्याझ्वलय् २२५ गः यःमरि दयेकाः सकसितं इना बिउगु खः ।

यःमरिपुन्हिया लसताय् जूगु उगु ज्याझ्वलय् यःमरि पुन्हिया सांस्कृतिक महत्वया जानकारी नं बिउगु खःसा ‘त्यःछिं त्यः’ म्येँ नं हाःगु खः । झिंन्याम्हेसित यःमरि दयेकेगु तालिम बिउगु ज्याझ्वलय् यःमरिया सांस्कृतिक व थीथी पक्षयात कयाः न्ह्यसः लिसः कासाया नं ग्वसाः ग्वःगु खः ।

अथे हे उगु हे ज्याझ्वःया दथुइ पासा पुचः गुथि युके लन्दनया नायः संयुक्त श्रेष्ठं निर्माण यानादीगु ‘यःमरिम्यान’ नांया कम्प्युटर गेमया नं उलेज्या याःगु खः । उगु यःमरिम्यानया उलेज्या क्याथि मानन्धरं यानादीगु खः ।

छम्ह काल्पनिक मनूयात सुपरहिरोकथं क्यनातःगु यःमरिम्यान गेमपाखें मस्तय्सं यःमरिया सांस्कृतिक पक्ष व यःमरिया बारे जानकारी कायेत ग्वाहालि जुइगु विश्वास संस्थाया नायः श्रेष्ठं प्वंकादिल । ज्याझ्वय् लन्दनय् च्वनाः नेपाःया सांस्कृतिक आन्दोलनयात ग्वाहालि यानाच्वनादीम्ह पत्रकार केशव कोइरालायात नं हंगु खः ।

 

सम्बन्धित बुखँ

LEAVE YOUR COMMENTS