‘किपुल्चाया धंयाः’ सफू उलेज्या

येँ – ऐतिहासिक बस्ती किपुल्चा (किसिपिडी)या अमूर्त संस्कृतियात कयाः तेजमाया महर्जन (निभाः महर्जनं) च्वयादीगु अनुसन्धानमूलक नेपालभाषाया सफू ‘किपुल्चाया धंयाः’ म्हिगः छगू ज्याझ्वःया दथुइ मूपाहाँ संस्कृतिविद् सत्यमोहन जोशी व विशेष पाहाँ चन्द्रागिरी नगरपालिकाया मेयर घनश्याम गिरीं मंकाः कथं उलेज्या यानादिल । ज्याझ्वलय् नेपालभाषा केन्द्रीय विभागया निवर्तमान प्रमुख सहप्राध्यापक नापं समीक्षक तुल्सीलाल सिंह, च्वमि तेजमाया महर्जन, मेयर घनश्याम गिरी, मूपाहाँ सत्यमोहन जोशीपिंसं सफू व किपुल्चाया ऐतिहासिकताया कयाः थःथःगु नुगः खँ तयादीगुखः ।

चन्द्रागिरी नगरपालिका वडा नं ५ या वडा नायः कान्छाभाइ महर्जनं लसकुस यानाः न्ह्याःगु उगु ज्याझ्वलय् किपुल्चाया द्वारे हर्कबहादुर महर्जनया सभापतित्वय् जूगु खः अथे हे ज्याझ्वलय् तुल्सी महर्जन, कृष्ण महर्जन, नेपालभाषा केन्द्रीय विभागया प्रमुख सह प्राध्यापक सृजना प्रधान, विभागया शिक्षकपिं डा. तुयुबहादुर महर्जन, जीवनकुमार महर्जन, शरद कसाः, राजितबहादुर श्रेष्ठ, हलिं नेवाः गुथिया शान्तदास श्रेष्ठपिंसं ब्वति कयादीगु खः ।