मस्कोय् नं दु कुमारीया भक्त
येँ – रूसय् च्वंपिं कुमारी माजुया भक्तपिनि ब्वनाय् नकतिनि रूसया राजधानी मस्को भ्रमण यानाः पुलांम्ह कुमारी माजु मतिना शाक्य येँय् लिहां झाःगु दु । बरोबर नेपाः वयाः कुमारी दर्शन यानाच्वंपिं रूसी नागरिकपिं भाजु इगोर अगोरोदनिकोभ व मय्जु दुर्सन बाडालोभां पुलांम्ह कुमारी मय्जु मतिनायात मस्को ब्वनादीगु खः । वय्कःपिं निम्ह रूसया नांजाःपिं कानून व्यवसायी खः । वय्कःपिंसं नेपाःया कुमारी संस्कृति व कुमारी माजुप्रति मनूतय् श्रद्धा बांलाक थू । उकिं रूसय् नं कुमारी संस्कृति बारे प्रचार याये माल धकाः वय्कःपिंसं थ्व ज्याझ्वः ग्वसाः ग्वयादीगु खः ।
मस्को च्वनाजःछि मस्को विश्व–विद्यालयय् कुमारी संस्कृति बारे छगू अन्तक्र्रिया ज्याझ्वः जुल । अन नेपाःया कुमारी संस्कृति व जीवित देवीया बारे सिउपिं रूसी अनुसन्धाता लिसें पुलांम्ह कुमारी मतिना शाक्यं थःपिनि खँ कनेगु यानादीगु खः । मस्को विश्वविद्यालयं मतिनायात १२ कक्षा लिपा थ्वहे विद्यालयय् ब्वं वा धकाः इनाप नं याःगु खः ।
उकथं हे रूसया लागिं नेपाःया राजदूतावासं नं छगू ज्याझ्वः याःगु खः । अन पुलांम्ह कुमारी लगायत कुमारीछेँया महेन्द्र शाक्यं नं कुमारी संस्कृति बारे न्ववानादीगु खः । अथे हे नेपाःया लागिं पुलांम्ह रूसी राजदूतं नं नेपालय् कुमारी सालीगु जात्राया बारे कनादीगु खः ।
मतिना लिसें तुं मस्को झाःम्ह वय्कःया अबु प्रतापमान शाक्यं कनादी कथं रूसय् नं कुमारी संस्कृति व कुमारी माजुप्रति अपार हे आस्था दुपिं मनूत दुगु जुयाच्वन । मतिनायात उमिसं न्ह्याथाय् यंकूसां अतिकं श्रद्धा तःगु खँ नं शाक्यं कनादिल ।
रूसय् कुमारी संस्कृति बारे प्रचार प्रसार यायेगु लागिं कुमारी छेँया मय्जु दुर्गा शाक्यं च्वयादीगु कुमारी संस्कृति सम्बन्धी सफूयात रूसी भासं भाय् हिलेगु ज्या नं क्वचायेधुंकूगु दु । अन हे च्वनादीम्ह च्वमि कृष्णप्रसाद श्रेष्ठं अनुवाद यानादीगु रूसी भाय्या उगु सफू नेपालय् हे वयाः विमोचन यायेगु तयारी जुयाच्वंगु दु ।
LEAVE YOUR COMMENTS