एकारामया लुमन्तिइ विचाः मुँज्या
येँ – नेवाः देय् दबुलिं कलाकारलिसें नेवाः कला संस्कृतिया अन्वेषक, अनुसन्धानकर्ता, सांस्कृतिक अभियन्ता एकाराम सिंया लुमन्तिइ विचाः मुँज्या यात ।
जुम प्रविधिया माध्यमं देय् दबूया नायः नरेश ताम्राकारया सभापतित्वय् मदुम्ह कलाकार सिंया लुमन्तिइ बागू मिनेट मौन धारण यासें न्ह्याःगु ज्याझ्वलय् लोककवि राजभाई जकःमिपाखें वय्कःया किपाय् स्वां देछासे वय्कःया जीवनी न्ह्यब्वयादीगु खः ।
ज्याझ्वलय् मदुम्ह एकारामलिसे नेवाः संस्कृतिया ख्यलय् आपालं सतिक च्वनाः ज्या यानादीम्ह संस्कृतिविद् डा. चुन्दा वज्राचार्य, नीगू दशकं मल्याक कला, संस्कृति व पुरातत्व ख्यलय्नापं ज्या यानादीम्ह राष्ट्रिय अभिलेखालयया निमित्त महानिर्देशक सौभाग्य प्रधानाङ्ग, चितवनया राजेन्द्रकुमार पिया, देय् दबूया सल्लाहकार डा. पुष्पराज राजकर्णिकार, तिस्तुंग कुन्छालया निराजन गोपाली, निर्मल वज्राचार्य, चैनपुरया पदमकुमार शाक्य, ख्वना आन्दोलनया अभियन्ता नेपाल डंगोल, पासा पुचः गुथि, युकेया संयुक्त श्रेष्ठ, प्रकाशनया ख्यलय् ज्या यानादीम्ह माधवलाल महर्जन, नुवाकोटया नारायण श्रेष्ठ, साहित्यकार शाक्य सुरेन, कलाकार कमलेश महर्जन, संस्कृतिवद् ओम धौभडेलं मदुम्ह कलाकार एकारामं भाषा, कला, संस्कृति, सम्पदा, थीथी संघसंस्थया निंतिं म्हितादीगु भूमिका, वय्कःया योगदानया विषययात कयाः नुगःखँ प्वंकादिसें विचाः हायेकादीगु खः ।
ज्याझ्वलय् मदुम्ह कलाकार सिंया किजा जेविन्द्र सिंह, जहान रति सिंपाखें नं नुगःखँ प्वंकादीगु ज्याझ्वलय् देय् दबूया नायः ताम्राकारं सुभाय् देछानादीगु खः।
LEAVE YOUR COMMENTS