रक्षा विधेयकय् राष्ट्रपति ट्रम्पं तःगु भिटो खारेज

एजेन्सी – अमेरिकी संसदं रक्षा खर्च सम्बन्धी विधेयक राष्ट्रपति डोनाल्ड ट्रम्पं छ्यःगु भिटोयात चिइकाबिउगु दु। राष्ट्रपति ट्रम्पया कार्यकालय्व य्कलं छ्यलादीगु भिटोयात संसदं अस्वीकार याःगु थ्व न्हापांखुसी खः । वय्कःया हे पार्टी रिपब्लिकनतय् नियन्त्रणय् दुगु च्वय्या सदन सिनेटं राष्ट्रपतिया भिटो चिइकेत दुर्लभ रुपं संसदय् सहलह न्ह्याकूगु खः । सिनेटया ८१ म्ह सांसदत राष्ट्रपतिया भिटोया विरुद्धय् दंगु खःसा झिंस्वम्हेस्यां जक राष्ट्रपतियात समर्थन याःगु खः । सिनेटं ट्रम्पं भिटो छ्यलाः पनेत स्वःगु नेशनल डिफेन्स अथराइजेसन एक्ट (एनडीएए)यात पारित याःगु दु। थ्व विधेयकयात कयाः क्वय्या सदन हाउस अफ रिप्रेजेन्टिभं न्हापा हे स्वीकृति बीधुंकूगु दु ।

न्हूगु रक्षा विधेयक वइगु दँया रक्षा नीतिया निंतिं ७ खर्ब ४० अर्ब डलरया प्रस्ताव दुथ्याःगु विधेयक खः । राष्ट्रपति ट्रम्प थ्व विधेयकया छुं छुं व्यवस्थायात कयाः न्ह्यसः थँसे थुकियातपनेत स्वःगु दु। अफगानिस्तान व युरोपं अमेरिकी सेना लित हयेगु विषययात सीमित यायेत स्वःगु खँय्ट्र म्पया असन्तुष्टि दुगु खः ।

राष्ट्रपति ट्रम्पं थ्व विधेयकय् दुथ्यानाच्वंगु सामाजिक सञ्जाल कम्पनीतय् जिम्मेवारी स्पष्ट यायेमाःगु व्यवस्थायात नं चिइके चाहे जूगु खः । थःगु भिटोविरुद्ध मतदान लिपा ट्रम्पं ट्विट यानातःगु धाःगु दु, ‘रिपब्लिकन सिनेटरतय्सं नं सेक्सन २३० पाखें मुक्ति जुइगु ह्वःताः त्वःफिकूगु दु। गुकिं तःधंगु प्रविधि कम्पनीयात असीमित अधिकार बियातःगु दु। दयनीय !’

राष्ट्रपति ट्रम्पं थ्वयां न्ह्यव च्यागू विधेयकय् भिटो छ्यलेधुंकूगु दु। थ्व फुक्कं भिटोय् धाःसा रिपब्लिकन सांसदतय्सं साथ बिउगु खः । तर राष्ट्रपतिया कार्यकाल क्वचायेत छुं ई ल्यं दनिबलय् धाःसा रिपब्लिकनतय्सं हे राष्ट्रपतियात साथ मबिल । ट्रम्पं ४५०० पेजया थ्व विधेयकयात चीन व रुसपाखें वःगु उपहार धकाः टिप्पणी याःगु दु ।