
एजेन्सी- पश्चिमी देय्तय्स चिकं निर्यातय् प्रतिबन्ध तल धाःसा युरोपय् ग्यासया आपूर्ति बन्द यायेगु ख्याच्वः रुसं बिउगु दु । रुसया उपप्रधानमन्त्री अलेक्सान्डर नोभाकं चिकंया आपूर्तिइ प्रतिबन्ध तल धाःसा विश्वन्यकं विनाशकारी लिच्वः लाइगु व चिकंया मू निदुगं जुयाः प्रति ब्यारल ३०० डलर थ्यनीगु ख्याच्वः बिउगु दु ।
अमेरिकां थीथी देय्लिसे जानाः रुसयात चिकंया आपूर्ति प्रतिबन्ध तयेत स्वयाच्वंगु दु, तर जर्मनी व नेदरल्यान्डं थुकियात अस्वीकार यानाच्वंगु दु । युरोपय् ४० प्रतिशत ग्यास व ३० प्रतिशत चिंक रुसं वनाच्वंगु दु । रुसं यदि ग्यासया आपूर्ति बन्द यानाबिल धाःसा युरोपयाके मेगु विकल्प मदु ।
थ्व हे झ्वलय् राष्ट्र संघं युक्रेनया सर्वसाधारणयात मेगु थासय् सुरक्षित वनेगु लँ चायेका बिइत इनाप याःगु दु । रुसं मेरिपोल, खार्किभलिसें थीथी शहरय् निकास मार्गया प्रस्ताव तःगु खः । तर युक्रेनया अधिकारीतय्सं धाःसा उगु लागाय् रुसं बमबारी यानाच्वंगु धाःगु दु । रुसं मंगलवाः रुसया स्थनीय ई कथं सुथसिया १० बजे निसें राजधानी किएभ लिसें थीथी शहरय् युद्धविरामया घोषणा यानाः युक्रेनी शरणार्थीतय्त मेगु देशय् सुरक्षित वनेत धाःगु खः । युक्रेनं आःतक दकलय् अप्वः शरणार्थी पोल्याण्ड वंगु दु । पोल्याण्डय् झिगू लाखं मल्याक शरणार्थी वनेधुंकूगु दु ।
रुस व युक्रेन दथुइ जुयाच्वंगु युद्धया दथुइ बिहिवाः टर्कीइ रुस व युक्रेनया विदेशमन्त्री दथुइ वार्ता जुइगु जूगु दु । रुस व युक्रेनया प्रतिनिधि दथुइ स्वंगू चरणया वार्ता जुइधुंकूसां वार्तां छु नं लिच्वः पिहां वःगु मदुनि ।
बिहीवाः टर्कीया राष्ट्रपति रेचेप तय्यप एर्दोआनया मध्यस्थताय् रुसया विदेशमन्त्री सेर्गेइ लाभरोभ व युक्रेनी विदेशीमन्त्री दिमित्रो कुलेबा दथुइ टर्कीया दक्षिणी शहर अन्तलायाय् जुइत्यंगु दु । रुसी विदेशमन्त्री लाभरोभ व युक्रेनी विदेशमन्त्री कुलेबां नं थीथी सञ्चार माध्यम मार्फत थुकिया पुष्टि याःगु दु ।
LEAVE YOUR COMMENTS