येँयाःया पंचबुद्धयात गं देछात

येँ – येँयाःया झ्वलय् कुमारिया खः सालीबलय् कुमारिया रथ न्ह्यः न्ह्यः बिज्याइपिं पञ्चबुद्धपिंत गं लःल्हाःगु दु । वसपोलपिंत सुरुची ट्राभल्सया समुद्रमान बज्रााचार्य व रेणु बज्राचार्यपिंसं गं लःल्हानादीगु खः ।येँयाःया कुमारिया खः सालीगु इलय् गणेश व भैरवया रथ लिपा कुमारीया रथ न्ह्यःने बिज्याइपिं न्याम्ह गुरुजुपिंत पंचबुद्धकथं कायेगु याः ।

वसपोलपिं गं थाथां रथ सालीगु लँपु बिज्याइगु खः । पञ्चबुद्धया न्याताजि रंगया जामा, मुखः पुनाः गं थानाः रथयात्राय् चाःहिलीगु प्रचलन दु । गुरुजुपिंसं थाना बिज्याइगु गं पुलां जूगु व बांलाक मन्याःगुलिं वय्कःपिंसं न्हूगु गं न्यानाः लःल्हाःगु खः । राजगुरुजु मञ्जुश्रीरत्न बज्राचार्यं कनादी कथं येँयाःया झ्वलय् पिहां वःगु लाखे, पुलुकिसि, सवभकु आदियात दँय् दसं गुथि संस्थान, नगरपालिकापाखें न्हूगु लं जामा लगायत आर्थिक ग्वाहालि नं याना वयाच्वंगु दुसा पंचबुद्ध गुरुजुपिंत आः तकं छुं हे बियाच्वंगु मदु ।

अथे जुयाःदातापिं माला थ्व गं लःल्हायेगु ज्या जूगु खः । गुरुजुपिंत मुखः, जामा लं व मेमेगु सामानया आवश्यकता जुयाच्वंगु व दातापिं नं मालाच्वनागु जानकारी बियादिल ।