थुगुसी गणेश व भैरव द्यः भाजुपिं महिल

येँ – यँयाः पर्वय् कुमारीलिसें तुं रथय् तयाः द्यः सालेमाःपिं गणेश व भैरव द्यःपिं थुगुसी मोहनिया फूलपाती कुन्हु हिलीगु धकाः चर्चा जूसां हिलेगु ज्या धाःसा मजुल । वर्तमान गणेश व भैरव द्यः भाजुपिं तःधी जुया वःगुलिं वसपोलपिनि थासय् न्हूपिं द्यः तयेगु लागिं मोहनि न्ह्यः कुतः जूगु खःसां अन्तिमय् द्यः हिलेगु ज्या धाःसा मजूगु खः ।

आः वसपोल द्यः भाजुपिं थ्वहे वइगु चैतदशैं कुन्हु हिलेगु कथं तयारी जूगु खँ शाक्य महाविहार संघया जः संघरत्न शाक्यं ‘नेपालभाषा टाइम्स’ यात कनादिल । थुगुसी द्यः भाजुपिं हिलेगु लागिं संघपाखें पहल याःगु खः । उकिया लागिं येँ देय्या झिंखुगू बहाःयात आह्वान यानाः नां दुकाःगु खः ।

दुहां वःगु नां मध्ये निम्ह मचाया नां गणेश व भैरवया लागिं सिफारिस यानाः संघं पञ्चांग समितियात छ्वया बीधुंकूगु दु । पञ्चांग समितिं मोहनिया इलय् ज्या मयाःगु व लिसें वर्तमान द्यः भाजुपिनि अभिभावकपिंसं नं आः हे द्यः महिउसा जिउ धइगु इच्छा क्यनादीगुलिं थुकियात छुं भचा लिछ्यानागु खँ नं भाजु शाक्यं कनादिल ।

द्यः भाजुपिं आसनं कुहां बिज्यायेवं हे वसपोलपिंत शाक्य संस्कार कथं बन्दे छुइगु ज्या यायेमाः । वसपोलपिंत बन्दे जुइबलय् पुचःया थाकुलि दयेकाः संस्कार यायेमाःगु चलन दु ।