कोरोनां नरः जात्रा नं स्थगित

येँ (नेपालभाषा टाइम्स) – कतिंपुन्हिया कन्हय् कुन्हु नरलय् न्यायेकीगु तिसा मालेगु जात्रा नं थुगुसी स्थगन याःगु दु। कोरोना संक्रमणया कारणं आपालं नखःचखः व जात्रा पर्व प्रभावित जुयाच्वंगु झ्वलय् नरःया तिसा मालेगु जात्रा नं प्रभावित जूगु खः ।

स्वनिगलय् लिपांगु इलय् कोरोना संक्रमितया ल्याः न्हिथं अप्वया वनाच्वंगु कारणं येँ महानगरपालिका वडा नं. ५ स्थित नरलय् न्याकीगु जात्रा नं स्थगन याःगु खः । परम्परागत रुपं जात्रा यायेगु ज्या मजूसां दँय्दसं याइगु पुजा आराधनाया विधि धाःसा पूवंकूगु खः । पुजारी व सीमित गुथ्याःत जक च्वनाः विधिकथं यायेमाःगु पुजा जक याःगु खः ।

नरः जात्राय् स्वम्ह नारायण द्यःया जात्रा यायेगु याना वयाच्वंगु खःसा थन जुइगु जात्रायात ‘गनं मदुगु जात्रा’ नं धायेगु याः । मेमेथाय् स्वयां फरककथं द्यःखःयात अःखः यानाः जात्रा याइगु कारणं गनं मदुगु जात्रा धकाः धायेगु याना वयाच्वंगु खः । च्वकाथू नारायणद्यः अर्थात चोक्टेनारायण द्यःया जात्राया निंतिं गुथिया जग्गाया तकं व्यवस्था यानातःगु दु । च्वकाथू नारायण द्यःया लुखाय् नेपालभाषां च्वयातःगु अभिलेखकथं थ्व जात्रा जुजु नरेन्द्र मल्लया पालंनिसें शुरु जूगु खः ।

स्वीम्ह स्वयां अप्वःसिनं द्यः खः कुबीमाःगु व जात्राय् नरःया सकलें गुथ्याःत उपस्थित जुइमाःगु नियम दुसा थुगुसी कोरोना संक्रमणया कारणं जात्रा स्थगित यानागु वडा ज्याकुथिं जानकारी बिउगु दु ।