सिख्वंमू बहालय् दुर्लभ वज्रसत्वअभिषेक

येँ – थनया बसन्तपुलिइ च्वंगु श्रीखण्ड तरुमूल महाविहार (सिख्वंमू बहाल)य् अतिकं दुलर्भ वज्रसत्व अभिषेक ज्याझ्वः जुल । बौद्ध दर्शन अध्ययन पुचःया ग्वसालय् जूगु ज्याझ्वलय् झिम्हेसित दुर्लभ वज्रसत्व अभिषेक बीगु ज्या जूगु खः ।पुचःपाखें न्ह्याका वयाच्वंगु थीथी बौद्ध दर्शन कक्षाया झिम्ह प्रशिक्षार्थीपिं नेमविलास वज्राचार्य, त्रिरत्न वज्राचार्य, मिन्दुरत्न वज्राचार्य, कृष्णमान वज्राचार्य, नविनरत्न वज्राचार्य, कविर वज्राचार्य, सागर वज्राचार्य, राजेश वजाचार्य, राजिव वज्राचार्य व कुशल वज्राचार्य दीक्षित जुयाबिज्याःगु खः ।

वसपोलपिं सकसितं बौद्ध विद्वानलिसें बौद्ध गुरु यज्ञमानपति वज्राचार्यं वज्रयान बौद्ध परम्पराकथं सिख्वंमू बहालय् हे जूगु छगू विशेष वज्रयान बौद्ध पुजा यासें अभिषेक बियाः दीक्षित यानाबिज्याःगु खः । थ्व संसारय् गुलि नं प्राणी, जीवजगत, वस्तुत दु, व दक्वं छन्हु मदया वनी, फुना वनी । मनूया जन्म जुइ, ल्यासे ल्याय्म्ह जुइ, ज्याथजिथि जुइ ।

अले छन्हु मृत्यु जुइ । सकलें प्राणी थ्व हे जीवनचक्रय् चाःहिलाच्वंगु दइ । थुकियात हे अनित्य संसार धाइगु खःसा थ्व संसारय् न्हापांनिसें दयाच्वंगु, आः नं दुगु व लिपाथ्यंकं दयाच्वनीगु छुं दुसा व वज्रसत्व हे खः धइगु मान्यता दु । थ्व हे मान्यताकथं वज्रसत्व दर्शनया ज्ञान व झिंन्यासः दँ न्ह्यःया वज्रसत्व चर्याम्येँया भावय् थुकथं दुर्लभ वज्रसत्व अभिषेक बीगु ज्या जूगु खः ।सिख्वंमू बहालय् पुचःपाखें थुुकथंया दीक्षा बीगु ज्या जूगु थ्व स्वक्वःखुसी खः ।