येँयाःया भिडियो डकुमेन्ट्री च्यालेञ्ज जुइगु
येँ (नेपालभाषा टाइम्स)/ येँ महानगरपालिकां येँयाःया झ्वलय् भिडियो डकुमेन्ट्री च्यालेञ्ज याइगु जूगु दु । थ्व च्यालेञ्ज स्वंगू विधाय् जुइ । येँ महानगरपालिकापाखें सोमवाः छगू पत्रकार सम्मेलन यानाः बिउगु जानकारी कथं न्हापांगु विधा अन्तर्गत थुगुसीया जात्राय् आधारित भिडियो सामग्री जुइसा निगूगु विधा अन्तर्गत न्हापाया जात्रा व थुगुसीया जात्राया तुलनात्मक दृश्य दुथ्याकातःगु सामग्री जुइ । थ्व निगुलिं विधाय् झिंखुदँ निसें पीदँ तकयापिंसं जक ब्वति कायेदइ । अथेहे स्वंगूगु विधा १५ निसें २० सेकेन्डया जात्राया भिडियो जुइ । थुकी न्ह्याम्हेसिनं नं ब्वति काये दइ । थ्व स्वंगुलिं विधाय् न्हाप, लिउ व लियांलिउ लाःपिंत छसिकथं छगू लाख, न्यय्द्वः, नीन्याद्वः तका दां सिरपाः सहित दसिपौ लःल्हाइ ।
येँयाः जात्राया तयारी, जात्रालिसे सम्बन्धित धार्मिक, सांस्कृति व सामाजिक पक्ष, जीवन्त मूर्त अमूत पक्ष, कलात्मक देगः, चैत्य, बहाःबही, चुक, बस्ती, शास्त्रीय व तान्त्रिक विद्याय् आधारित प्याखं, नाटक व बाजं, मौलिक भेषभुष व श्रृंगार यानाः न्ह्यब्वइगु प्रस्तुति व प्रदर्शनीया उल्लाहस भिडियो च्यालेञ्जया मू विषय जुइगु खँ धाःगु दु ।
अथेहे जात्राया झ्वलय् भदौ २० गते जमःनिसें हनुमानध्वाखा तक सम्पदा पदयात्रा जुइ । थ्व पदयात्राय् विशिष्ट पदाधिकारी व कुटनीतिक क्षेत्रया प्रतिनिधित दुथ्याइगु खँ धाःगु दु । अथेहे जात्राया झ्वलय् भदौ २३ निसें २५ तक स्वन्हुयंकं मेड इन काठमाडौं शीर्षकय् ब्वज्या जुइ । थ्व ब्वज्याय् चाःया सामान दयेकेगु कला, येँ महानगरपालिकाया थीथी वडापाखें तालिम काःपिं उद्यमशील मिस्तय्सं दयेकूगु उत्पादन व स्थानीय सामान प्रदर्शन जुइ । थ्व ब्वज्याया झ्वलय् येँयाः सम्बन्धी तस्बिर व नेवाः नसाज्वलंया ब्वज्या नं जुइ ।
पत्रकार सम्मेलनय् न्ववासें येँ महानगरपालिकाया प्रवक्ता व १७ वडाया अध्यक्ष नवीन मानन्धरं येँयाः जात्रा छुं छगू निकाय, संगठनं याइगु जात्रा मखसे स्वःचालित जात्रा जूगु धासें येँ महानगरपालिकां थुकियात व्यवस्थित यायेगु निंतिं जक ज्या याइगु खँ धयादिल । वय्कलं धयादिल, ‘येँयाः जात्राया झ्वलय् खः सालेगु, थीथी प्याखं पिदनीगु, थाय्थासय् द्यः ब्वयेगु लिसे यक्व कथंया ज्याझ्वः जुइ, अले थ्व फुक्क स्थानीय गुथितय्सं स्वतःस्फूर्त रुपं याइ । थ्व येँ महानगर वा मेगु छुं नं सरकारी निकायं न्ह्याकीगु जात्रा मखु, थ्व जात्रा व्यवस्थित यायेत येँ महानगरं ग्वाहालि जक यायेगु जुइ ।’
LEAVE YOUR COMMENTS