तोखाया बिस्काःलय् छगू लाख मनू

येँ – येँया उत्तरी भेगय् लाःगु तोखाया बिस्काः जात्राय् करिब छगू लाख स्वयां अप्वः मनुखं अवलोकन याःगु दु । दँय्दसं बैशाख १ निसें ४ गतेतक तोखाय् जुइगु जात्रा स्वयेत स्वनिगः व उकिया जःखः थीथी थासं आपालं भक्तजन व स्वकुमिपिनिगु सहभागिता दुगु खः ।जात्राय् तोखाया कुमारि व गणेद्यःयायात प्यन्हुयंकं खतय् तयाः जात्रा यानाः नगर परिक्रमा याकूगु खः ।

जात्राया झ्वलय् तोखाया चण्डेश्वरी लगायतया थीथी द्यःपिंत सिन्हः ह्वलाः जात्रा यायेगु नापं स्थानीय थीथी द्यःया पुजा नं याःगु खः । प्राचीन इलय् तोखाया वस्तीइ थीथी कथंया खराब शक्तिं मनूतय्त दुःख बीगु यायेवं इमित सुरक्षित यायेत जात्राया चलन शुरु याःगु धइगु जनविश्वास दु ।

थुगुसीया जात्रायात सुरक्षित व व्यवस्थित यायेगुनापं द्यःखः जात्राया इलय् जुइफुगु सम्भावित ल्वापु जुइके मबीया निंतिं जात्रा ज्वःछि तोखान्यंकं व उकिया जःखःया लागाय् अय्लाः थ्वँ मी मदइगु व्यवस्था याःगु खः । अथे हे जात्राया निंतिं आवश्यक स्वयमसेवकया व्यवस्था यानाः व्यापक रुपं परिचालन नं यानागुलिं जात्रा शान्तपूर्ण रुपं क्वचाःगु जात्रा व्यवस्थापन समितिया नायः गणेशमान श्रेष्ठं कनादीगु दु ।