‘आदिवासी आन्दोलनयात दलीयकरणं मुक्त याये नु’
येँ (नेपालभाषा टाइम्स)-२९ क्वःगु अन्तर्राष्ट्रिय आदिवासी जनजाति दिवस म्हिगः थीथी ज्याझ्वः यानाः हन । ‘हिउपाःया संवाहक आदिवासी युवा’ धइगु नारा बियाः देय्न्यंकं दिवस हंगु खः । थुगुसीया आदिवासी दिवसय् आदिवासी युवाया सक्रियता व सशक्तीकरणयात बः बियागु खँ नेपाल आदिवासी जनजाति महासंघं धाःगु दु ।
दिवसया लसताय् म्हिगः येँया बानेश्वरय् जनजाति आयोगं छगू ज्याझ्वः याःगु खःसा आदिवासी जनजाति महासंघं नेपाल प्रज्ञाप्रतिष्ठानय् ज्याझ्वः याःगु खः । उकथं हे नेपाल आदिवासी जनजाति पत्रकार महासंघ (फोनिजं) नं म्हिगः येँय् छगू ज्याझ्वः यात ।
प्रज्ञा प्रतिष्ठानय् जूगु ज्याझ्वलय् मूपाहां कथं झाःम्ह प्रधानमन्त्री पुष्पकमल दाहाल अधिवक्ता भगवती पाण्डें तामाङ समुदाय लगायतया संस्कारयात कयाः बिउगु अभिव्यक्तिपाखे सरकारया ध्यानाकर्षण जूगु खँ कनादिल । लिसें वय्कलं पाण्डे दोषी खनेदत धाःसा कारबाही यायेगु खँ नं धयादीगु दु ।
उकथं हे वय्कलं वंगु साउन १७ गते पाण्डेयात ज्वनेमाःगु माग यासें जूगु प्रदर्शनय् बल प्रयोग याःपिं प्रहरीयात नं कारबाही यायेगु खँ धयादिल ।
सभा न्ह्यः महासंघं येँय् छगू ¥याली नं पिकाःगु खः । उकी नेवाः देय् दबू लगायत थीथी जातीय समुदायतय्सं ब्वति काःगु खः ।
उकथं हे म्हिगः जनमत पार्टीं सतकय् मुनाः आदिवासी जनजातिया माग प्रति ऐक्यबद्धता प्वंकूगु दु । यँेया फिब्व ख्यलय् मुनाः आदिवासी जनजातिं सरकारयात तःगु माग प्रति पार्टीं ऐक्यबद्धता प्वंकूगु खः ।
थःगु पार्टी आदिवासी जनजाति, मधेशी व लिउने लाकातःगु समुदायया हक अधिकारया निंतिं ल्वाइगु पार्टी जूगुलिं ऐक्यबद्धता प्वंकेत फिब्व ख्यलय् मुनागु खँ पार्टीया प्रवक्ता डा. शरद सिंह यादवं धयादिल ।
थ्वहे झ्वलय् लोकतान्त्रिक समाज– वादी पार्टीया वरिष्ठ नेता राजेन्द्र महतों आदिवासी आन्दोलनयात दलीयकरण व एनजीओकरणं मुक्त यायेमाःगु खँ धयादिल । आदिवासी दिवसया झ्वलय् म्हिगः भिन्तुना सन्देश बिसें वय्कलं आदिवासी आन्दोलनयात दलीय राजनीतिपाखें बचे यानाः ल्यं दनिगु क्रान्तियात पूवंकेत न्हूगु व एकीकृत संघर्ष आवश्यक जूगु खँ नं धयादीगु दु ।
सन् १९९४ डिसेम्बर २३ कुन्हु संयुक्त राष्ट्रसंघया साधारणसभां अगष्ट ९ तारिखयात अन्तर्राष्ट्रिय आदिवासी दिवस कथं हनेगु घोषणा याःगु खः ।
LEAVE YOUR COMMENTS