ने. सं. ११४४ ञलाथ्व दशमी -

पशुपति विकासं जात्रा पनीन

येँ – सदियौं निसें न्ह्याना वयाच्वंगु ग्वलदेय्या छगू महत्वपूर्ण जात्रा पशुपति विकास कोषं जग्गा हड्पे याःगु कारणं दीगु सम्भावना ब्वलंगु दु । थ्वहे चैत्र ८ गतेनिसें ग्वलया पिगंद्यःयाथाय् देशोउद्धार पुजा यासें न्ह्याकेमाःगु उगु जात्रा थुगुसी मन्याये फुगु खँ सम्बद्ध जात्राया गुथियारतय्सं धाःगु दु ।

उगु जात्रा सञ्चालन यायेत तयातःगु १३ रोपनी जग्गा पशुपति विकास कोषं अधिकरण यानाः दुकायेवं जात्रा संकटय् लाःगु खः । थनिं ७ दँ न्ह्यः कोषं उगु जग्गा अधिकरण याःगु खः । अथे खःसां गुथियारतय्सं थःगु हे खर्चं जात्रा चले यानाः वयाच्वंगु खः । आः थःपिंसं तुं खर्च याये फइगु अवस्था मदुगुलिं थुगुसी जात्रा दिके मालीगु खँ गुथियारतय्सं धाःगु दु ।

ग्वलया पिगंद्यःयाथाय् जुइगु थ्व जात्राय् नेवाः समाजया प्यंगू वर्णय् दुथ्याःगु थीथी जातित छथाय् च्वनाः पुजा याइगु खः । थ्व प्यंगू वर्ण मध्ये क्षेत्री वर्णया जातितय्गु नामय् लानाच्वंगु जग्गा विकास कोषं अधिकरण याःगु खः । क्षेत्री वर्णय् नेवाः समुदायया
वैद्य, राजभण्डारी, शाक्य व श्रेष्ठयात दुथ्याकातःगु दु । प्यंगुलिं वर्णया मनूत छथाय् च्वनाः पुजा याइगु जात्रा जूगुलिं थुकियात जातीय समन्वयकारी पर्वया रुपय् कायेगु यानातःगु दु ।

पाहाँचः¥हे ताकाय् न्यायेकीगु थ्व पर्वय् फुक्कं वर्णया थाकुलिपिंत ताःहाकःगु बेतालिं चिकेगु ज्या जुइगु खः । मिटर का मिटर ताःहाकःगु बेतालिं चिकीगु जुयाः थाकुलिपिंत मेपिं मनूतय्सं बेतालि ज्वनाः ग्वाहालि याये मालीगु खः । थ्व खास यानाः देशय् हे शान्ति जुइमा धइगु उद्देश्य तयाः याइगु जात्रा खः ।

थ्व प्यंगू वर्ण मध्ये क्षेत्री वर्णया नेवाः समुदायं ब्वति मकायेवं मेपिंसं जक जात्रा न्ह्याके मफइगु खँ धाःगु दु । सम्बद्ध गुथियारतय्सं धाःकथं जात्रा चले यायेत तयातःगु उगु जग्गा रैकर याना तयेधुंकूगु जग्गा खः । तर पशुपति विकास कोषं उगु जग्गाया थुवाःतय्गु नां तयेबलय् विकास कोषया नां नं दुथ्याकेमाः धकाः शर्त तःगुलिं गुथियारतय्सं उकियात अस्वीकार याःगु याना बिउगु खः । थुकिं यानाः कोषं थ्व जग्गा नं लित मबीगु व मेगु जग्गा नं सट्टाभर्ना तया मबिउ । कोषं जात्रा चले यायेत तयातःगु जग्गा अधिकरण यानाः देय्या संस्कृति न्हंकेत स्वःगु द्वपं गुथियारतय्सं बिउगु दु ।