नवदुर्गाया ख्वाःपाः दयेकीपिं न्हू पुस्ता मवल

ख्वप- नवदुर्गा देवगणया ख्वाःपाः दयेकीम्ह छम्ह जक पूर्ण चित्रकार लिपा मेगु पुस्ता तयार मजुइवं गनं देवगण प्याखं हे दीगु सम्भावना अप्वया वनाच्वंगु दु । झिंस्वम्ह द्यःया ख्वाःपाः दयेकेगु ज्या याना वयाच्वंम्ह चित्रकारया कथं द्यःया ख्वाःपाः दयेकाः छेँजः लहित तकं थाकूगु कारणं न्हू पुस्ता मवःगु कारणं थःम्हं मदयेकूसां सुनां दयेकी धकाः न्ह्यसः तयादी ।

वय्कलं धयादिल, ‘देवगणया ख्वाःपाः जिं मदयेकूसां जिम्मेवारी काइपिं सु दु ? थ्व पेसायात निरन्तरता सुनां बी ? ख्वाःपाः दयेकाः न जस दु, न त प्रोत्साहन हे दु, पिने ज्या याःवंसा झिंन्यासः निद्वः ज्याला वइ, तर ख्वाःपाः दयेकाः न छेँजः लहिफु नं गुजारा हे चले जू ।’ वय्कःया कथं वय्कःया छेँजःपिं तकं थ्व पेसापाखें तापायेधुंकूगु दु ।

हरेक दँया गथांमुगः च¥हे निसें दयेकेगु शुरु यानाः मोहनीया महानवमी कुन्हु चान्हय् तक ख्वाःपाः तयार यायेमाः । महानवमीया चान्हय् ब्रम्हायणी शक्ति पीठय् तान्त्रिक विधिं पुजा यानाः न्यासः तयेगु ज्या लिपा नवदुर्गा प्याखँ सुरु जुइ । नवदुर्गा प्याखं ख्वपया थीथी नीछगू थाय् लिसें मध्यपुर थिमि चाँगु, भ्वँत, धौख्य, पन्ति, सांगा, श्रीखण्डपुर, खम्पु ढुर्खक थासय् च्याला तक ल्हुइकेगु याइ । द्यः प्याखं हुइकेगु तयारी याइगु ख्वाःपाः दयेकेत हाकुचा, थीथी कथंया ल्वहँया रङ, लुँ, मैदा, मचिकं, कपाय् नेपाली भ्वँ, जुटया बोरा, कोरा कापः, माय् लगायतया सामग्री माः ।

वय्कःया कथं स्वयेबलय् अःपुसां थ्व ज्या तसकं थाकु । ख्वाःपाः दयेके न्ह्यः न्हापां चायात धू यानाः चाले यायेमाः, वयां लिपा मैदाया माड दयेका चाधू तयाः न्हायाः ग्वःचा ग्वःचा दयेकेमाः । ग्वचा गने धुंकाः हाकनं कपाय् व नेपाली भ्वँ तयाः तछ्यायेमाः वयां लिपा जक ख्वाःपाः दयेकेगु ज्या न्ह्याइ ।

ख्वाःपाः दयेकेधुंकाः निभालय् पाये मजिउ, फसं जक गंकेमाः । छपाः ख्वाःपाः गंकेत म्होति नं निवाः काइ । थःगु अनुभव कनेगु झ्वलय् वय्कलं धयादिल, ‘ख्वाःपाः जक दयेकां मजिउ, गथांमुगः च¥हे कुन्हु चायात विधिवत् रुपय् पुजा यायेमाः, थुकथं चा पुजा यायेत वइपिं बाजागाजा सहितया पुचःया भ्वय् नकेमाः ।

आम्दानी स्वयां खर्च अप्वः जूगुलिं छेँजःपिं पाखे ख्वाःपाः मदयेकेत आपालं दबाब बियाच्वंगु खँ नं वय्कलं कनादिल । नवदुर्गा प्याखंयात निरन्तरता बियाः परम्परायात तंके मबीगु खःसा सम्बन्धित निकायं ख्वाःपाः दयेकेत माःगु आयस्ताया व्यवस्था यायेमाःगु सुझाव नं वय्कलं बियादीगु दु । वय्कःया कथं ख्वाःपाः दयेकेत ज्यामि, माःगु सामग्री व थःगु ज्याला नं तयेगु खःसा म्होतिं नं स्वंगू लाख खर्च जुइसा ख्वाःपाः दयेकेत थुगु दँय् २९ हजार जक वःगु धासें मेगु ज्या यायेत थम्हं हे तयेमाःगु खँ नं धयादिल ।

चित्रकारं नवदुर्गाया ख्वाःपाः दयेकेगु ज्या विसं २०२० निसें याना वयाच्वंगु खः । वय्कलं ख्वपया धरोहर व धर्म संस्कृति ल्यंकेत थम्हं ख्वाःपाः दयेकेगु ज्या मत्वतागु खँ नं कनादिल ।