आः नर्सतय्त जापान ज्या दयेफु
येँ – यदि नेपाः सरकारं भचा सुझबुझ यात धाःसा नेपाःया आपालं नर्सत रोजगारीया लागिं जापान वने फइगु स्थिति वःगु दु । विदेशीतय्त ज्याय् तयेगु सवालय् जापानं आः नकतिनि याःगु छगू न्हूगु व्यवस्थाया कारणं नेपाःया लागिं थ्व अवसरया लुखा चालेत्यंगु खः ।
जापानं नर्सिङ लगायत कृषि व निर्माणलिसे सम्बन्धित स्वंगू लाख विदेशी ज्यामियात थःगु देशय् ज्या बीगु नीति पारित यायेवं नेपाःया वैदेशिक रोजगार कम्पनीतय्गु नं मिखा चाःगु खः ।
थौंकन्हय् नेपाःया हे कलेजय् उत्पादन जूपिं ८५ द्वः नर्स नेपालय् दु । उकी मध्ये गुलिखे नर्सत ज्या मदयाः बेरोजगार हे जुयाच्वंगु दुसा गुलिं चाहिँ तसकं कम तलबं ज्या यानाच्वंगु दु । आः जापानं नर्सतय् लागिं नं लुखा चायेकूगु कारणं नेपालय् उत्पादन जूपिं नर्सत जापान वने खनीगु सम्भावना अप्वःगु खः । तर उकिया लागिं नेपाः सरकारं सुझबुझपूर्ण पलाः ल्ह्वने माःगु खँ रोजगार व्यवसायीतय्सं धाःगु दु ।
वैदेशिक रोजगारीया सवालय् नेपालं कडा कडागु शर्तत तयातःगु कारणं विदेश वनेत इच्छुकपिं नापं वने मफइगु अवस्था जुयाच्वंगु खँ रोजगार कम्पनीतय्सं धाःगु दु । जापानं आः तयार याःगु न्हूगु नीतिइ कम जक सुविधा बीगु खँ उल्लेख जुयाच्वंगु दु । यदि उकी हे नेपालं अडान काल धाःसा जापानया थ्व मामिला नं मलेशिया थें जुइगु ख्याच्वः नं रोजगार कम्पनीतय्सं बिउगु दु ।
यदि जापानया थ्व अवसर कायेगु सवालय् नं नेपाः सरकारं थाकुगु शर्त न्ह्यःने तयाच्वन धाःसा जापानं तयार याःगु कोटा फुक्कं मेमेगु देशया रोजगारतय्सं जायेकीगु ख्याच्वः नं उमिसं बिउगु दु । नेपाः सरकारं धाःसा थुकिया बारे छुं धाःगु मदुनि ।
LEAVE YOUR COMMENTS