उपयोग याये मफुगु बँु अनिवार्य रुपं ‘भूमि बैंक’ य् तयेमाः

येँ – छुं हे ज्याय् प्रयोग मयासे तयातःगु बुँ वा जग्गा आः भूमि बैंकयात बियाः उपयोग याके माःगु नियम सरकारं हयेत्यंगु दु । थुकिया लागिं तयार यानातःगु विधेयक थौंकन्हय् संसदया कृषि सहकारी तथा प्राकृतिक श्रोत समितिइ सहलह जुयाच्वंगु दु । सरकारं आः देय्न्यंकंया भूमियात गुंगू प्रकारय् विभाजित याःगु दु ।

थुकी व्यावसायिक, कृषि, औद्योगिक आदि प्रकारया भूमि दइ । थःपिंके दुगु भूमि थ्व गुंगू मध्ये छगू प्रकारय् समावेश यानाः उपयोग याये हे माः । यदि थःपिनि भूमि थ्व गुंगू मध्ये छुं हे प्रकार दुने मलात धाःसा उकियात भूमि बैंकय् ‘डिपोजिट’ यायेमाःगु प्रावधान दु । भूमि बैंकय् डिपोजिट जूवःगु बुँयात बैंकं ज्या यायेत इच्छुकपिं मनूतय्त ‘त्यासा’ बियाः अन ज्या याके बी ।

उकिया वापत वं बैंकयात ब्याज पुली । बैंकं भूमि थुवाःयात नं ब्याज बी । थथे जुइबलय् सुयां नं भूमि खाली मजुइगु व बुँ दुसां ज्या याये मफुपिं मनूतय्गु भूमि नं उपयोग जुइगु आशा याःगु दु । देशय् छुं नं भूमि खाली मजुइमा व उकियात छुं नं कथं उपयोग याये फयेमा धइगु ताः तयाः थ्व अवधारणा हःगु खः । बुँ खाली याइपिंत सजायँ हे बीमाः धइगु पुलांगु प्रावधान धाःसा आः चीकूगु खँ धाःगु दु ।