कोरोनाया मेगु खोप परीक्षणय्

एजेन्सी – कोरोना भाइरस विरुद्ध विकास याःगु मेगु छगू खोप मनूतय्के परीक्षण यायेगु सुरु जूगु दु। बेलायतय् विकास याःगु थ्व खोपं प्रतिरक्षा क्षमता अप्वयेक फइ कि फइमखु धयागु परीक्षण याना स्वयेत्यंगु खः ।

परीक्षणया निंतिं वइगु वालय् थ्यंमथ्यं स्वसःम्ह स्वयंसेवीतय्त खोप बीइ त्यंगु दु। इम्पेरिअल कलेज लन्दनय् सुरु याःगु परीक्षणया नेतृत्व प्राध्यापक रोबिन शाटोक व वया सहकर्मीतय्सं यानाच्वंगु दु ।

जनावरय् यानाच्वंगु परीक्षणं थुगु खोप सुरक्षित दुगु व प्रतिरक्षा प्रणाली सबल यायेत प्रभावकारी दुगु क्यंगु खः । अक्सफोर्ड विश्वविद्यालयया विशेषज्ञतय्सं नं थ्वयां न्ह्यः हे थज्याःगु हे मेगु खोपया मानव परीक्षण सुरु यायेधुंकूगु दु। थौंकन्हय् विश्वन्यंकं थ्यंमथ्यं १२० गू खोप विकास कार्यक्रम न्ह्यानाच्वंगु दु ।

वित्तीय क्षेत्रय् ज्या यानाच्वंम्ह ३९ दँया क्याथी थ्व परीक्षणय् सहभागी जूम्ह मध्ये छम्ह स्वयंसेवी खः । वं धाःगु दु, ‘खोप मवयेकं झी सामान्य जीवनय् लिहां वयेफइगु धयागु थूगुलिं हे जि परीक्षणय् ब्वति काः वयागु खः ।’

थ्व खोपया न्हापांगु चरणया परीक्षण लिपा वइगु अक्टोवरय् मेगु चरणया परीक्षण यायेगु योजना दु। थुकी खुद्वः मनूतय्सं ब्वति काइगु खँ धाःगु दु ।

थ्वहे दथुइ बेलायती राजकुमार विलियमं चर्चिल अस्पतालय् अक्स्फोर्ड विश्वविद्यालयं याःगु परीक्षणय् सहभागी स्वयंसेवीतय्त नापलाःगु दु। राजकुमारं स्वयंसेवकतय् प्रसंशा यासें उमिसं याःगु ज्या तसकं रोमाञ्चक व स्वागतयोग्य जूगु खँ धाःगु दु ।