चित्लाङया विश्वविद्यालय नं येँय् वइन

येँ – मदन भण्डारी फाउन्डेशन मार्फत मकवानपुर जिल्लाया चित्लाङय् चीन सरकारं निर्माण यानाबीत्यंगु ‘मदन भण्डारी प्राविधिक विश्वविद्यालय’ आः अन मखुसें येँया कागेश्वरी–मनोहरा नगरपालिकाय् निर्माण याइगु संकेत खने दया वःगु दु । चित्लाङया थाहा नगरपालिका व येँया कागेश्वरी नगरपालिका दथुइ थ्व विश्वविद्यालय थःथाय् हयेगु लागिं ताः ई न्ह्यवंनिसें तानतान जुया वयाच्वंगु खः ।

आः अन्तिम इलय् वयाः थ्व विश्वविद्यालय चित्लाङं येँय् सरे जुइत्यन धासें थाहा नगरपालिकाया जनप्रतिनिधितय्सं दुःख प्वंका हःगु दु ।
चीनं वःगु प्राविधिक टोलीं चित्लाङय् निर्माणस्थलया अध्ययन–अवलोकन यानाः प्रक्रिया समेत न्ह्यःने यंकेधुंकूगु अवस्थाय् थ्व विश्वविद्यालय येँय् यंकेत्यंगु धइगु थाहा नगरपालिका, प्रदेश सरकार, प्रदेश सांसद र संघीय सांसदतय्गु प्रभाव व शक्ति मगाःगुया चिं खः धयाहःगु दु ।

थ्व विश्वविद्यालयया लागिं चित्लाङय् ३० दँया लागिं जग्गा बीगु धकाः सहमति समेत जुइधुंकूगु खः । तर उकियात त्वःताः आः येँया कागेश्वर नगरपालिकां डाँछीस्थित भीर पर्ति समेत यानाः १५६ रोपनी जग्गा बीगु धकाः प्रस्ताव न्ह्यःने तःगु खः ।

यदि थ्व विश्वविद्यालय चित्लाङय् दयेकल धाःसा स्थानीय मनूतय्त रोजगारीया नापं चित्लाङ–थानकोट–चन्द्रागिरीया सुरुङ मार्ग व स्थल मार्ग याकनं दयेकेत नं सरकारयात दबाब लाइगु आशा यानातःगु खः । चित्लाङय् थ्व विश्वविद्यालय वइ धकाः आपालं मनूतय्सं जग्गा समेत न्यायेगु शुरु याना हःगुलिं अन जग्गा भाः तकं थहां वनाच्वंगु दु ।