ने. सं. ११४६ तछलाथ्व दशमी -

‘नेवाः वस्ती व सम्पदा जोगे यायेत थ्व निर्णय यानागु खः’

येँ – नेवाःतय् पुलांगु वस्ती मध्ये छगू खः, पन्ति । उकी नं पन्ति वडा नं ७ नेवाःतय् बाहुल्य दुगु लागा खः । पन्तिया आपालं जात्रा व संस्कृति न्ह्याइगु वडा नं वहे खः । वहे वडां मंगलवाः छगू महत्वपूर्ण निर्णय यात । निर्णय खः – वडा दुनेया स्मारक क्षेत्रय् च्वंगु जग्गा नेवाः जाति बाहेक मेगू जातियात मी दइमखु ।

थ्व निर्णय छाय् जुल ? थ्व विषयलय् वडा नं ७या अध्यक्ष रामचन्द्र नास्नानी नाप ‘नेपालभाषा टाइम्सं ‘ खँल्हाबंला याःगु दु । थन न्ह्यब्वयाच्वना वय्कःया धापु वय्कया हे खँपु कथ :

पन्ति नगरपालिका दुने वडा नं ७ छगु ऐतिहासिक लागा खः । उकी दुने नं स्मारक क्षेत्र नेवाःतय् बाहुल्य दुगु लागा खः । पन्तिइ जुइगु ८० प्रतिशत जात्रा व संस्कृतिक ज्याखँत थ्वहे त्वालय् जुइ । ल्यँ दुगु २० प्रतिशत जक मेमेगू त्वालय् जुइ । थ्व क्षेत्रयात विश्व सम्पदा क्षेत्रय् सूचिकृत यायेगु ज्या नं न्ह्यायेधुंकूगु दु ।

म्हिग वैशाख २३ गते च्वंगु वडा समितिया मुँज्यां थनया स्मारक क्षेत्रया जग्गा नेवाः जातियात जक मी दइगु धकाः निर्णय यात । थ्व निर्णय नेवाः वस्ती व नेवाः सम्पदायात जोगे यायेमाः धइगु मनतुनां यानागु खः ।

पन्ति दुनेया ८० प्रतिशत जात्रा परम्परा थ्वहे त्वालं जुइ । थ्व छगू ऐतिहासिक व पुरातात्विक महत्व दुगु थाय् खः । तर थौं जात्रा संचालन यायेत, संस्कृति चले यायेत, खः सालेत मनूत मदयेधुंकल । उकीं म्हिगया मुँज्याय् जि नापं प्यम्ह वडा सदस्यतय्सं थ्व निर्णय यानागु खः ।

थन थज्याःगु व्यवस्था यायेमाः धका दच्छि न्ह्यः निसें हे स्थानीय जनतां इनाप यानाच्वंगु खः । वय्कःपिनि हे सुझाव व समर्थनय् निर्णय यायेगु ज्या जूगु खः । स्थानीय मनूतय् समर्थन दुगुलिं थ्व झीसं बांलागु हे निर्णय यानाथें च्वं । छुं नं कथं गलत ज्या यानाथें मच्वं ।

छुं नं ज्याय् समर्थकत नं दइ, विरोधीत नं दइ । म्हिग झीसं यानाःगु निर्णयलय् आपलं जनतां साथ बियादीगु दु । थुकीयात कार्यान्वयन यायेगु निंनिं कानूनविद्त नाप नं सहलह जुयाच्वंगु दु ।

नेवाःतय् संस्कृति, जात्रा व वस्ती ल्यंकेगु निंतिं फुक्क नेवाःत सजग जुइमाः । नेवाःतय् पुलांगु वस्ती दुगु पन्तिया थीथी वडा नापं धौख्यः व भ्वतया जनप्रतिनिधित नाप नं नेवाः वस्ती ल्यंकातयेगु बारे सहलह जुयाच्वंगु दु ।

झी सजक व सचेत जूसाः जक नेवाः भाय्, संस्कृति व वस्ती ल्यंकातयेफइ ।